Kirmen Uribe idazleak poema irakurraldia egingo du gaur Genevako Nazioa Batuen egoitzan
Kirmen Uribe idazle ondarroarrak euskararen hotsak ekarriko ditu gaur Genevako Nazio Batuen Erakundearen Giza Eskubideen aretora. Miquel Barceloren kupula ospetsuaren pean Uribek eta Manuel Rivas galiziarrak euren lanak irakurriko dituzte, batak euskaraz eta galegoz, besteak. Ama Hizkuntzen Nazioarteko Egunaren karira antolatu dute ekitaldia. Hil honen hondarrean, aldiz, Portugalen izango da Uribe, 'Bilbao-New York-Bilbao' eleberriaren itzulpena aurkezteko.
Corpus-ko Eusko Etxeak, Argentina iparraldean, helbide elektroniko berria ireki du 'Kontaketa Harrigarrietarako'
Joan den astean EuskalKultura.com-eko orriotan Misiones probintzia argentinarreko Corpus-ko Eusko Etxeak deitutako 'Kontaketa Harrigarri'en Lehiaketako hirugarren deialdiaren berri ematen genuen. Antolatzaileak gugana zuzendu dira, adierazteko oraingoan, "jasotako eskabideak kontutan hartuz" helbide elektroniko berri bat zabaldu dutela, soilik originalak biltzeko, lehiaketan parte hartzea erraztearren; izan ere asko baitira Buenos Airestik mila kilometro pasexe iparraldera dagoen Corpusetik urrun bizi diren pertsonek egindako kontsultak eta parte hartzeko adierazitako interesa. Originalak bidaltzeko azken epeak martxoaren 30a segitzen du izaten.
Euskal nobela beltzak lekua izango du astelehenean Bartzelonan hasiko den BCNegra jaialdian
Jose Javier Abasolo, Jon Arretxe eta Aingeru Epalza idazleek parte hartuko dute datorren astean hasiko den Bartzelonako nobela beltzaren jaialdian, euskal literatura beltza eta kriminalaren errealitate eta etorkizunaren berri emateko. Eurekin batera Asier Muniategi, Euskadiko Liburu Azoken koordinatzailea, ariko da. Erein argitaletxea ere jaialdian izango da, 'Uzta Gorria', nobela beltzari eskainitako euren sail berria aurkeztuz. Ostegunean mahaingurua egingo dute hiriburu katalanean.
Etxepare Institutua euskal kulturaren presentzia bultzatzeko ahaleginetan ari da Mexikon Guadalajarako Azokan
Guadalajarako Nazioarteko Liburu Azoka ari da egiten aste honetan Mexikon eta karia horretara mexikoratua da Aizpea Goenaga Etxepare Institutuko zuzendaria. Besteak beste azokako zuzendari Nubia Maciasekin bildu da, euskal idazleek azokan parte hartze handiagoa izateko akordio puntuetara helduz. Aztertutako gaien artean, euskal idazleek euskal literatura ezagutzera emateko mahainguruak bultzatzea eta baita ere Euskadik gonbidatu berezi gisa parte hartzeko aukera. Unai Elorriagak 'Londres kartoizkoa da' bere nobela aurkeztu zuen asteartean Azokan.
Kirmen Uribe, NY-eko errezitaldiez: "Euskal Herria guk uste dugun baino gehiago ezagutzen da kanpoan"
Berri onak pilatzen ari zaizkio Kirmen Uribe idazleari AEBetan 'Bilbao-New York-Bilbao' eleberria aurkezteko egiten ari den errezitaldi biran. Batetik, 'Brooklyn Rail' literatur aldizkari estatubatuar ospetsuak liburuaren bi atal argitaratu ditu, ingelesez. Argitalpen hau eleberria AEBetan plazaratze aldera aurrerapauso handia izan daiteke. Bestetik, Sagar Handian eginiko emanaldietara jendetza hurreratu dela diosku egileak. "Inor ez da harritzen esaten dudanean euskalduna naizela", gaineratzen du.
Kanpaina hasi du Sü Azia elkarteak Robert Laxalten 'Sweet promised land' protagonistaren xibereraz kaleratzeko
Harribitxia da euskarazko argitalpenen munduan, eta Gabonetan egiteko opari ederra zein xiberotar euskalkia eta kultura sustatzeko aukera bikaina izan daiteke. Baina ez hori bakarrik. Robert Laxalt euskalamerikarraren eleberria Ameriketara artzain joandako euskaldun baten bizipenen kontaketa zirraragarria da, amerikartze prozesuarena eta irakurleari Oesteko natura basati eta librearen emozioa sentiarazten diona. Xiberoko Sü Azia elkartea ahalegin berezia egiten ari da orain xiberotarrez, xibereraz argitaratzen. Kultur taldeak irakurleen laguntza eskatzen du eta liburua aldez aurretik erosita merkeago eskuratzeko aukera eskaintzen du. Hona Baionako Herria aldizkariak horren inguruan plazaratu deia, zuberera edo xiberotarrez idatzirik.
Euskal kultura eta literatura ardatz hartu nahi dituen 'KZ' aldizkari elektronikoa sortu dute Argentinan
Sareratu du bere lehenengo alea KZ euskal kultura eta literaturari eskainitako aldizkari elektroniko berriak, bere burua "Diasporatik Euskal kulturaz gogoeta egiteko aldizkari digitala" gisa aurkezturik Argentinatik 'Euskalduna' irakurle klubak bultzaturik sortua den ekimen berriak. Irakurle, irakurlegai eta publiko zabalarekin harreman berriak sortzeko ideia du buletin honek, beti ere euskal kultur zabalkundea helburu, adierazi diote EuskalKultura.com-i Euskaldunatik. Lehenengo aleko eduki dira bi elkarrizketa, hurrenez hurren, Joan Mari Irigoien eta Harkaitz Canorekin, Jose Migel Barandiarani buruzko testu bat eta Fito Rodriguez EIEko presidentearen artikulu bat.
Anjel Lertxundik irabazi du Espainiako Saiakera Saria 'Eskarmentuaren paperak' lanagatik
Espainiako Kultura Ministerioak eman ohi duen Saiakera Saria jasoko du Anjel Lertxundi idazle euskaldunak (Orio, 1948), "Eskarmentuaren paperak" lanagatik. 2009an Espainiako Estatuan argitaratutako saiakerarik onena izan dela ebatzi du epaimahaiak. Saiakera Lertxundik batzuetan jorratu duen generoa da, sarriagotan aritua baita haur literatura, ipuingintza eta eleberrigintzan. Berria egunkarian egunero idazten du Lertxundik, paperean zein blogean. Saria ibilbide osoaren aitortza delakoan jaso duela esan du oriotarrak.
Anjel Lertxundik irabazi du Espainiako Saiakera Saria 'Eskarmentuaren paperak' lanagatik
Espainiako Kultura Ministerioak eman ohi duen Saiakera Saria jasoko du Anjel Lertxundi idazle euskaldunak (Orio, 1948), "Eskarmentuaren paperak" lanagatik. 2009an Espainiako Estatuan argitaratutako saiakerarik onena izan dela ebatzi du epaimahaiak. Saiakera Lertxundik batzuetan jorratu duen generoa da, sarriagotan aritua baita haur literatura, ipuingintza eta eleberrigintzan. Berria egunkarian egunero idazten du Lertxundik, paperean zein blogean. Saria ibilbide osoaren aitortza delakoan jaso duela esan du oriotarrak.
Idazle oiartzuarra gogoan eginiko 'Juan Mari Lekuonari Omenaldia' liburua sareratu du Euskaltzaindiak
Euskaltzaindiaren Herri Literatura Batzordeko buru izan zenaren omenezko liburua argitaratu eta ipini du Euskaltzaindiak sarean, interesa izan dezaketen guztien eskura. Juan Mari Lekuonak ahozko euskal literaturaren inguruko lan ugari argitaratu zituen; oraingoan, ikertzaile adiskide eta ikasle izan zituen hainbat egilek, apaiz oiartzuarra gogoan harturik, harek hain gogoko izan zuen gaiari buruzko artikuluak idatziz osatu dute liburu hau, paperean zein pantailan irakur daitekeena.
