Juan Bautista Avalle-Arce hil da Iruñean, hispanista handia, nafarra, euskaltzalea, bere erroen maitalea
Joan den Eguberri egunean hil da Iruñean 82 urte zituela eta luzaz eri egon ondoren Juan Bautista Avalle-Arce irakaslea, Cervantesen espezialdutako hispanista eta 2003an erretiratu aurretiko azken hamarkadan Santa Barbara-Kaliforniako Unibertsitateko (UCSB) Jose Migel Barandiaran Euskal Ikasketa Katedrako titularra izan zena. Buenos Airesen jaioa, nafarren seme zen eta nafar sentimendua zeukan, euskaltzalea eta euskal kulturaren aldekoa. Hispaniar literaturari emana bizi ostean, azkeneko urteetan bere euskal erroetara hurbilagotu eta Kaliforniako Unibertsitatetik erretreta hartu ondoren Nafarroara etorri zen bizitzera, EuskalKultura.com-i 2003ko apirilean UCSBko Espainol eta Portuges Departamentuak eta Barandiaran Katedra utzi zituenean esan ziona eginez.
Txindurri du izena Montevideoko Euskal Erria EEan sortu den euskal folka lantzen duen bikoteak
Txindurri du izena Uruguaiko Euskal Erria Euskal Etxearen baitan sortu den euskal folk bikoteak. Bertako bi euskara ikaslek, Leonel Aguirre eta Martin Zabalzak, osatzen dute. Gitarra bana lagun euskal kantutegi tradizionaleko zein berriko kantuak kantatzen dituzte, tartean 'Xalbadorren heriotzean', 'Loretxo bat' edo 'Azken dantza' bezalakoak. Orain artean euskal etxearen baitan ibili izan dira gehienbat, baina joan den azaroan Montevideoko Musika Zelta Jaialdian aritu ziren gonbidatu, euskal komunitatetik kanpoko lehenengo emanaldia burutuz, arrakastatsu burutu ere.
10. urteurrena ospatzeko 'Maral' taldeak bere disko berrirako abestiak proposatzera gonbidatu du publikoa
Maral talde argentinarrak hamar urte beteko ditu 2010ean eta urtemuga ospatzeko oso proposamen polita atera du jarraitzaileentzat. 'Esaidazu abesti bat… eta CD bat irabazi ahal izango duzu' leloarekin gonbidatu dute publikoa disko berrirako kanta bat, gaztelaniaz nahiz euskaraz, hautatzera. Jendearen erantzuna eskertzeko, hamar cd zozkatuko dituzte parte hartzen duten lagunen artean. Abestien izenak bidaltzeko epea abenduaren 31an bukatuko da, eta datuak Facebook edo e-mailez bidali daitezke. Lan berria otsailaren bukaeran kaleratuko da.
Hogei bat euskal sortzaile gazteren lanak ikusgai New Yorken asteartean zabalduko den erakusketan
Datorren asteartetik aurrera, hogei bat euskal artista gaztek euren lanak erakutsiko dituzte New Yorken 'Bilbao Arte-New Yorken' izenpean zabalduko den erakusketan. Artistak Bilbao Arte izeneko Bilboko udal zentruari lotuak dira eta erakunde horren hamargarren urteurrena ospatzeko emango dute hiri amerikarrerainoko jauzia. Erakusketa 2010eko otsailaren 9rarte luzatuko da Sagar Handiko 'Fundación Gabarrón-Carriage House Center'en eta zazpi ikusentzunezko obra, margolaritzako hiru, argazki alorreko sei eta teknologia berrietan oinarritutako beste bat erakutsiko ditu.
Atzoko Euskararen Egunarekin hasita hilaren 19ra arte luzatuko da Erroman 'Dicembre in Salsa Basca 09' ekimena
Atzoko Euskararen Egunarekin hasita abenduaren 19ra arte eratu du Erroman 'Associazione Culturale Euskara' elkarteak 'Dicembre in Salsa Basca 2009' egitaraua. Atzokoan, Euskararen Nazioarteko Egunarekin bat eginez, Donostiatik etorritako Asier Oyarzabal sukaldariaren pintxoek abiatu zuten bi aste baino gehiago luzatuko den programa. Hilaren 19an Maite Arroitajauregi eibartarraren kontzertuarekin amaituko den euskal kultur erakuslehio honek "gastronomia, hitzaldiak, soinu mapa, dokumentariak, jaia, zinema, kontzertuak eta instalazioak" bezalako proposamenak egingo ditu Erroman kulturaren zenbait arlotan zer eskainia daukaten artista eta sortzaile euskaldunen eskutik.
Euskal eta argentinar laburmetraia sorta bat emango du Buenos Airesen Laurak Bat-ek bihartik hasita
Euskal Herrian eta Argentinan filmatu eta ekoiztutako hainbat laburmetraien proiekzioa antolatu du Laurak Bat Euskal Etxeak Buenos Airesen larunbat honetarako eta hurrengorako. Zinemagintza independentea bermatzea eta zabaltzea helburu duen egitasmo honetan, Kimuak saileko zenbait laburmetraia eta Argentinako zinemagile gazte eta berriztatzaileen lanez gozatzeko aukera izango da. Hitzordua, bihar eta datorren asteko larunbatean, Laurak Bat-eko Sebastian Amorrortu Aretoan, sarrera libre eta doainik.
Antioquiako Euskal Gaien Ikasgunea, bost urte euskal kultura eta presentzia ezagutarazten Kolonbian
Medellin hirian, Kolonbiako Antioquia departamenduan, 'Antioquiako Euskal Gaien Ikasgunea' (Centro de Estudios Vascos de Antioquia) izeneko taldeko kideak euren sorreraren bosgarren urteurrena ari dira ospatzen egunotan, abenduaren 5era arte. Euskal kultura oro har, eta bereziki euskaldunek bertan utzitako urratsen arrastoa ikertu, ezagutu eta zabaltzeko asmoz abiatutako ekimen honek bere kide eta lagunak Medellingo jatetxe batera bildu zituen joan den azaroaren 14an, euskal zinema, musika eta gastronomia osagai izan zituen urtebetetze ekitaldia burutzeko, ikurrinak edergarri zeuzkan festa ireki batean.
Hitzaldi batekin Nueva Granadako euskal historia gai hartuta bukatuko da Antioquiako urteurren egitaraua
Hil honen 14an Antioquiako Euskal Gaien Ikasguneak (Centro de Estudios Vascos de Antioquia) bere sorreraren lehenengo bost urteak ospatzeko antolatutako elkarretaratzearen ondotik, hurrengo hitzorduak bihar ostirala, azaroaren 27an, eta bihar zortzi, abenduaren 4ean, izango dira, bi egunotan euskal zinema eta laburmetraiak erakutsiko direlarik, musika eta gastronomia osagaiak ere izango dituen dei batean. Azkenik, datorren asteko larunbatean, abenduaren 5ean, Ikasgunea sortu zuen John Alejandro Ricaurte historialariak hitzaldia eskainiko du, Nueva Granadako Erregeorderriaren Independentzia prozesuan euskaldunek izan zuten partaidetzaz, honekin amaiera ipiniz bosgarren urteurreneko ekitaldiei.
Francisco Avizanda nafarraren estreineko filmeak itxiko du Caracasen 'Zine Vasco'ren bigarren edizioa
'Hoy no se fía, mañana sí' du izena Francisco Avizanda (Izaba, 1955) nafarraren lehenengo luzemetraiak eta horixe izango da hilabete honetan zehar Venezuelako hiriburuan antolatu den 'Zine Vasco' euskal zine erakustaldiaren bigarren edizioa itxiko duen izenburua. Antolatzaileen esanetan, bigarren edizioak bete ditu helburuak, xedea "zazpigarren arte deitua den honetan euskal gauzak (Euskadiko, Nafarroako zein Iparraldeko, diote) islatzen dituzten ekoiztetxe, zuzendari, gidoilari, aktore, leku eta gaien ikuspegia ematea" baita. Gaur arratsaldeko emanaldia arratsaldeko zortzi t'erdietan izango da, Trasnocho Cultural-ean.
Iazko arrakastaren ondotik, otsailaren 1etik 12ra egingo da Buenos Airesen bertako 'Udako Euskal Unibertsitatea'
Argentinako 'Udako Euskal Unibertsitatea'ren antolatzaileek gonbitea luzatzen diete ikasle ohiei eta oro har parte hartu nahi dutenei 2010eko Ikastaroaren programaren aurkezpenera. Iazko lehenengo esperientziaren ondotik, aurtengo edizioa otsaileko lehenengo bi astez luzatuko da eta aurrekoak bezala, Euskal Herriko historian eta kulturan zehar paseatzea du helburu. Aurkezpena bihar asteartez egingo da eta horrekin batera 2009ko edizioko ikasleek egindako idazlanak ere aurkeztuko dira, guztiak liburu batera bilduta. Ekitaldia arratsaldeko sei t'erdietan izango da, Euskal Echea Institutuaren egoitzan, Buenos Aires hiriburuko Sarandi 735 helbidean.
