'Euskal elikadura, tradizionala ala modernista?' hitzaldiarekin ireki du 2013ko egitaraua Rauch-eko EEak
Buenos Aires probintziako Rauch-eko Gure Txokoa euskal etxeak antolaturik Euskal Herriko elikadurari buruzko mintzaldia burutu zen herriko Kultur Etxean. Ekintza honekin euskal kultura zabaltzea helburu duen urteko programa abiatu zuten. Maite Salsamendik emandako mintzaldiarekin batera, euskal dantzak ere taularatu ziren. Madalen Ibargoyen-ek zuzentzen duen taldeak zenbait pieza tradizional jendaurretu zituen.
Sao Pauloko Eusko Alkartasuna elkartean ia ehun gonbidatu bildu ziren Aberri Eguneko jaiaz gozatzeko
Sao Pauloko Eusko Alkartasuna elkarteak giro ederrean gozatu zuen 2013ko Aberri Egunaz, Gernika Kutun egoitzan egin zen jaiari esker. Eraikinaren lorategi ederra baliatu zuten elkarteko kideek, lagunarteko bazkari ederra egiteko bertan bildu ziren ia ehun gonbidatuekin. Bazkalostean, elkarteak omenaldia egin zion Mentxu Lizarzaburu bazkideari. Eusko Alkartasunaren sortzaileetako baten alaba da Mentxu, eta urte askotan elkarteko kolaboratzaile kementsu eta gogotsua izan da.
Zuzendaritza Batzordea berritu du Pehuajó-ko Etxe-Alai Euskal Etxeak; Liliana Ustarroz lehendakari
Urteroko bere Batzar Nagusia egin du Argentinako Pehuajó-n, Buenos Aires probintzia barnealdean, bertako Etxe-Alai Euskal Etxeak. 2013-14 eperako Zuzendaritza Batzordeko buru Liliana Ustarroz izango da eta batzordekide izango ditu, besteak beste, Nely Beatriz Alcorta, lehendakariorde; Nicolas Bazán, idazkari eta Maria Elida Oroz, diruzain.
Zazpirak Bat EEak bere azken berriak plazaratu ditu, tartean Asier Vallejo eta Sara Pagolaren bisitarena
Txile, Argentina, Uruguai eta Brasilgo euskal kolektibitatearekin elkartzeko egindako bidaian, Rosarioko Zazpirak Bat Euskal Etxean izan zen Asier Vallejo, Kanpoan den Euskal Komunitatearentzako zuzendaria. Sara Pagola ordezkariarekin batera burututako biran Zazpirak Bat-en egoitza ez ezik, Gernika Plaza ere bisitatu zuten Euskadiko mandatariek. Aktibitate handiko azken egun hauetan, gainera, beste ekimen batzuk gauzatu ziren Rosarioko euskal etxean, hala nola, San Prudentzio, Gernikako Bonbardaketaren urtemuga eta Aberri Eguna.
Boiseko Euskal Etxearen logo berria diseinatu nahi duzu? Segi bizkor, lehiaketa asteazkenean amaituko da!
Logo berria aukeratzeko lehiaketa deitu zuen apirilean Boiseko Euzkaldunak elkarteak eta, orain, parte hartzeko epea egun gutxi barru amaituko dela gogorarazi nahi diegu gure irakurleei. Boiseko euskal etxeko logo berriaren sortzailea izan nahi duenak asteazkena arte du epea proposamenak bidaltzeko. Irabazleak 150 dolarreko saria jasotzeaz gain, bere diseinua euskal etxearen webgunean, karteletan eta afitxetan ikusteko ohorea izango du.
‘Berissoko zaporeak’ liburuaren aurkezpena eta euskal afaria gaur La Platako Lazkao Tabernan
Ekintza gastronomiko bikoitza burutuko da gaur gauean La Platan, bertako Lazkao jatetxean. Batetik, ‘Berissoko zaporeak’ liburua aurkeztuko du Stella Loholaberry egileak tabernako arduradunak gonbidaturik. Baina segidan liburura biltzen diren Euskal Herriko errezeta batzuk prestatuko dira afarian dastatzeko. Gogora dezagun Stella Loholaberry-ren eta Antonio Ortiz-en ‘Berissoko zaporeak’ birrtan argitaratu dela -2002an eta 2012an- eta hamar urte hauetan bi sari jaso dituela dagoeneko.
Gernikaren gomuta Berlin, Bogota eta Montevideora heldu zen bertako euskal etxeen eskutik
Apirilaren hondarrean Gernikaren Bonbardaketaren 76. urteurrena munduko euskal etxeetan barrena gogoratu zen, nazien hegazkinek suntsitu zuten herriko biktimen oroimenez egin ziren ekitaldiei esker. Asko eta asko Argentinan egin ziren --artikulu bereiziki batean jasoko ditugu-- baina beste hainbat ere egin dira, tartean, esaterako, Alemanian, Kolonbian eta Uruguaien.
Larunbat honetan hasiko da AEBetako picnic sasoia, Fresnoko Euskal Jaialdiaren 36. edizioarekin
Hemen da jada AEBetako euskal etxeen picnic-en sasoia: larunbat honetan hasiko da, Fresno Basque Club elkarteko 36. Euskal Jaialdiarekin. Datozen hilabeteetan Estatu Batuetako txoko guztietara helduko dira jaialdiak, urriaren amaiera arte luzatuko den egutegian. Aurten egingo diren ekitaldien artean aipagarriak dira, besteak beste, Elkoko Basque Festival-a (uztailaren 5etik 7ra), NABOren bilkurarekin egingo dena; Kantari Eguna, abuztuaren 10ean Gardnerville-n; eta New Yorkeko Euzko Etxearen Mendeurreneko Gala, urriaren 13an.
Valeria Magliocchetti-ren eskaintza nafar eta euskal etxeei: gure musika-tresnen tailerra antolatzea
Proiektua martxan da eta hiru erakundetan ematen ari da tailerrak: Buenos Aireseko Eusketxe eta Nafar Etxean eta San Nicolaseko Euskal Etxean. Orain, eta proposamena zabaltzeko asmoz, webgunea sortu du musikariak eta berarekin kontaktatzera gonbidatu ditu interesa dutenak. Parte hartzeko ez da beharrezkoa aldez aurretik musika ezagutzarik ezta musika tresnak edukitzea ere. Besteak beste ikasgai dira txistua, txirula, alboka, silbotea, panderoa, txalaparta eta danbolinak eta proiektuaren helburua dantzariak laguntzeko musika taldeak sortzea ere bada.
Concordiako Gazte Lurrako dantzariek euskal dantza eta istorio ikuskizuna eman zuten Concepcion del Uruguay-n
Concordiako Gazte Lurra taldeko dantzariek, Argentinako Entre Ríos probintzian, Euskal Herriko dantza, istorio eta kontaketak biltzen dituen emankizuna eskaini zuten iragan ostiralean, apirilaren 26an, Entre Ríos probintzian bertan baina Uruguay ibaian behera dagoen Concepcion del Uruguay-n, bertako Ibai Txori Euskal Etxeak gonbidatuta. Ia ordu t'erdi iraun zuen saioa Mariano Silva Torrea Concordiako euskaltzale ezagunak aurkeztu zuen eta 'Carlos Maria Scelzi' Udal Auditoriuma izan zuen gertaleku.
