Saladilloko alkatea Itxaropen Euskal Etxean izan da eta Euskaditik etorritako bisitariak agurtu ditu
Bisita egin du Saladillon, Buenos Aires probintzia argentinarrean, bertako alkate Carlos Gorositok herriko euskal elkartearen egoitzara eta Itxaropen Euskal Etxeko lehendakari Hector Altamirak eta Zuzendaritza Batzordeko lagunek errezibitu dute. Ekitaldi berean Gorositok Euskaditik heldutako Aratz Arregi eta Ugaitz Iturbe bisitariak ere agurtu ditu, Saladilloko Cicaré Helicópteros enpresako ordezkariak Europan. Itxaropen euskal etxe saladillotarra ekimen puxanta da, aktiboa herrian, poliki poliki eta zatika, udala ere lankide egoitza eraikitzen joan dena.
Zuzendaritza berritu du Santiagon 'Txileko Euskal Gizataldea' EEak, Rossana Arza Pizarro lehendakari
Zuzendaritza Batzordea berritu du Santiagon Colectividad Vasca de Chile (Txileko Euskal Gizataldea) euskal etxeak Estadio Español izenekoaren egoitzan eginiko Urteko Ohiko Batzarrean. Rossana Arza Pizarrok segitzen du elkarteko lehendakari eta batzordekide izango ditu Daniel Zamudio Wehrhahn, lehendakariorde; Estrella Aguirre Pallavicini, idazkari; eta Patricio Achurra González, diruzain, besteak beste.
‘Kimuak’ laburmetraien emanaldi arrakastatsua Rio Cuartoko Leonardo Favio Kultur Gune berrian
Rio Cuartoko Gure Ametza Euskal Etxeak antolaturik, ‘Kimuak’ bildumako zazpi laburmetraia proiektatu ziren pasa den astean hiriko Leonardo Favio Kultur Guneko zine aretoan. Deialdiak oso erantzun ona izan zuen komunitatean eta euskal etxeko kideak ez ezik, Rio Cuartoko Unibertsitateko anitz ikasle ere inguratu ziren Kultur Gunera film laburrak ikustera. Instituzioko kideak oso pozik daude emaitzarekin eta murgilduta daude hurrengo proposamenean: maiatzaren 11ko FEVAko Buruzagi Formakuntzarako Tailerra.
Euskara, artea, dantza, musa, kirola, zinea, sukaldaritza... Uruguaiko Saltoko euskaldunen 2013ko eskaintza
Saltoko Euskaldunen Taldea du izena Saltoko (Uruguai) euskal etxeak eta aurten apiril honen hasierarekin bat zabaldu eta jakinarazi dute urteko, 2013ko, ekitaldien eskaintza. Ohi bezala ilusioz ekin diote eta euskaran, esaterako, Montevideotik datorkien Leonat Egiazabal izango dute aurrez-aurreko eta urrutizko irakasle. Horrekin batera jorratuko dituzte pintura, euskal dantzak, musa, sukaldaritza, zinema, kirolak, egingo dituzte ohiko festak...
Gaur da Gernikako 76. urteurrena, oroitzapena bizirik Argentinako eta munduko euskal etxeetan
Duela 76 urte herri bizkaitarrak jasotako erasoa gogoratuko ditu egunotan munduko euskal kolektibitateak mota askotako ekintzekin. Argentinan, esaterako, hitzaldiak, dokumentalak, erakusketak eta omenaldiak egingo dira, guztiak helburu berarekin: sarraskia salatu eta bakearen aldeko mezu bat aldarrikatzea. Hitzordu gehienak gaur bertan burutuko dira; beste batzuk, bihar, baina izan da gomuta-ekitaldiak aurreratu dituen euskal etxerik, Iparraldeko Euskal Etxea eta Gerora Elkartea, kasu. Gaurko eta biharko hitzorduetan parte hartu nahi dutenentzat, hona Arrecifes, Buenos Aires, Chascomus, Chivilcoy, La Plata, Parana, Rosario, eta Jose C. Paz-eko euskal etxeen egitarauak.
Gernikako Bonbardaketari buruzko Erakusketarekin itxiko du Euzko Etxeak sarraskiaren 75. urteurrena
Bonbardaketaren urteurren berri baten aste berean, La Platako Euzko Etxea-ra iritsiko da Jaurlaritzak eta Gernikako Bakearen Museoak sustatutako Erakusketa Ibiltaria, urtebeteko itinerazioa eginik. Inaugurazioa gaur, 26an bertan eta maiatzaren 1era arte bisitatu ahal izango da Islas Malvinas Kultur Gunean. Bihar gaiari buruzko hitzaldia eta asteartean zine-eztabaida ere bilduko ditu. Berri honekin batera, aurten euskal etxeak garatuko dituen ekintzen egitaraua ere plazaratu da. Ez ahaztu uholdeen tupusteko kolpe izugarria jaso ondoren, La Platako egoiliarrak eta Euzko Etxea bezalako elkarte eta auzoak gogor ari direla egoera normala berreskuratzeko ahaleginean. Euzko Etxeak igandean egingo du Urteroko Batzar Nagusia.
Limako Euskal Etxeak kantu artean eta giro ederrean ospatu zuen aurtengo Aberri Eguna
Aberri Egunaren ospakizuna iragan igandea arte atzeratu zuten Limako Euskal Etxeko bazkideek, ordura arte Hego Ameriketako euskal elkarteen MercoMus Txapelketan buru-belarri murgilduta izan zirelako. Ohi baino beranduago izan bazen izan bada ere, Limako Euskal Etxeak ez zuen Aberri Egunaren hitzordua galdu nahi izan eta, azken 27 urteotan bezala, lagun arteko bazkari eta elkarretaratze batekin ospatu zuen. Aurretik, meza elizkizuna eman zuen Miguel Irizar apezpiku euskaldunak, elkarteko abesbatzaren kantuek lagunduta.
Posadasko Euskal Jatorri Euskal Etxeak bere aldizkariaren zenbaki berria bertsio digitalean kaleratu du
Misiones probintzia argentinarreko Posadas hiriburuko Euskal Jatorri Euskal Etxeak bere buletinaren 23. zenbakia plazaratu du berri du. Aldizkaria bi formatutan eskura daiteke oraingoan, paperezko edizioan eta formato digitalean. Hala ere, eta bidaltzeko kostuak ekidite aldera, sareko bertsioa bultzatu nahi dute euskal etxekoek. Apirileko ale honetarako hautatutako gai nagusia Leitza da eta azaleko argazkiak eta artikulu nagusiak Nafarroako herria dute protagonista. Euskal etxean berehala burutuko diren ekintzak ere iragartzen ditu buletinak, horien artean, Ohiko Biltzar Orokorra (gaur), Euskara klaseak eta Zine Zikloa.
Necocheako Euzko Etxeak 40 eta 90. belaunaldi arteko etxeko dantzariak bildu zituen topaketa batean
Etxeko belaunaldi guztietako dantzariak gonbidatu zituen Necocheako euskal etxeak Dantzari Ohien Jaian parte hartzera. Proposamena oso arraskatsua suertatu zen eta azken sei hamarkadetan Euzko Etxea-ko dantza taldeetako kide izan zirenak elkarretaratze hunkigarri batean bildu ziren. Festarako, gainera, arropa eta argazki erakusketa eta galdera-erantzun jolasa prestatu zituzten antolatzaileek. Topaketaren baitan, oroigarri berezi bat eskuratu zitzaien dantzari ohi guztiei. Gaua berandu arte luzatu zen erromeria giroan.
Munduko euskaldunen Aberri Eguneko ospakizun gehiago: Las Vegas, San Salvador, Montevideo...
Diasporan zehar euskal etxe eta euskaldun talde askok Euskal Herrian baino geroago egin ohi dituzte Aberri Eguneko ospakizunak eta beraz oraindik ere zenbaiten berri ari da heltzen geurera. Estatu Batuetan, esaterako, Las Vegas hiriko Lagun Onak euskal etxeak hilaren 14ean egin zuen Aberri Eguneko jaia, Red Rock Canyon Parkean antolatu zuten piknik batekin. Aldiz, El Salvadorren, euskaldun talde batek Aberri Egunaren ospakizunaren baitan omenaldia eskaini zion euskaldun bati, Marta Gonzalez internazionalistari. Montevideon, Euskal Erria Euskal Etxekoek 101. urteurrena ospatu zuten Aberri Egunarekin batera.
