euskalkultura.eus

Viedma, Argentina. 'Beti Aurrera Aberri Etxea' elkarteak Argentinako bi herritako euskaldunak biltzen ditu: Rio Negro probintziako Viedma herrikoak eta Buenos Aires probintziako Carmen de Patagonesekoak. Hamahiru urte daramatza elkarte honek euskal kultura zabaltzen Patagonia iparraldean, baina orain arte ez zuen egoitza propiorik. Egoera hori laster aldatuko da, ordea. Hitzarmen baten bidez, Rio Negro probintziak etxe bat emango dio 'Beti Aurrera Aberri Etxea' erakundeari bertan euskal etxearen egoitza antolatzeko eta horren truke euskal etxeak lursail bat emango dio probintziako Parlamentuari. Etxea Viedma hirian kokatuta dago, Alberdi kalean hain zuzen, euskal etxeko ekitaldiak aurrera eramateko leku egoki batean.

['Beti Aurrera Aberri Etxea'ko kideak Bautista Mendioroz Rio Negroko gobernadoreordearekin]

“Parlamentuaren etxea etxebizitza legez funtzionatu izan du, beraz, aldaketa batzuk egin beharko ditugu gure ekimenak bertan gauzatu ahal izateko”, azaldu du Isabel del Carmen Labiano Euskal Etxeko lehendakariak. “Oso denbora gutxi barru egoitza prest egongo da euskara eta dantza klaseak, abesbatzaren entseguak eta Batzordearen bertan egin ditzagun”, adierazi du Labianok.

Parlamentuaren eta Euskal Etxearen arteko hitzarmena pasa den ekainaren 2an sinatu zen, eta probintziak euskaldunekiko duen engaiamendua azpimarratzeko, Bautista Mendioroz gobernadoreordeak bere laguntza eskaini zuen eraikuntzaren zaharberritze lanak egiteko. “Parlamentuko presidentea eta gainera euskal jatorrikoa izanik, nire asmoa euskal etxeak betidanik izan nahi izan duen egoitza lortzen laguntzea da”, esan du Mendiorozek.