Valladolideko Euskal Etxean egoitzaren 32. urteurrena ospatu zuten, euskara ikasleen kontzertu akustiko batekin

2015/02/25

Euskara ikasleek txunditu egin zituzten elkarteko bazkideak euren kontzertu ederrarekin (argazkia Valladolid EE)

PUBLIZITATEA

Gure Txokok, Valladolideko Euskal Etxeak, orain dela 32 urte zabaldu zuen egun duen egoitza eta ibilbide luze hori ospatzeko, festa handia egin dute joan den asteburuan elkarteko kideek. Gazteak zein nagusiak, denak bildu ziren elkartean egin zen bazkarira eta ondoren, biziki gozatu zuten euskara ikasleek eman zuten kontzertu akustiko bikainarekin. Zorionak Gure Txoko!

Valladolid, Espainia. 32 urte daramatzate Gure Txoko euskal etxeko kideek elkartearen egungo egoitzan, eta joan den larunbatean festa egin zuten data esanguratsu hori ospatzeko. Eguna bazkari batekin hasi zen eta ondoren, bazkalostean, sorpresa!: euskara ikasleek kontzertu ederra eman zuten, betiko abestiak azkenaldiko rock kanta ezagunekin nahastuz.

Kontzertua eman zuten ikasleak musikariak ere badira, eta Valladolideko beste zenbait taldetan aritzen dira. Honakoak izan ziren: Maria Cuenca, Martin Alonso (Chamanitos, Los Nadie) eta David (Mestizo). Azpimarratu beharra dago, ikasleak direnez, azterketa sasoian zirela eta astebetean prestatu behar izan zutela kontzertua. Hala ere, lan fina egin zuten eta entzuleak oso gustura izan ziren, kantuan eta txaloka. Hona kontzertuko abesti zerrenda: