euskalkultura.eus

Chascomús, Argentina. 'Duela hiru urte, Cordobako Euskal Astean, hain zuzen, aurkeztu genion Udalekuari buruzko proiektua Jaurlaritzako Euskal Gizataldeekiko Harremanetarako Zuzendaritzari', azaldu diote Zingirako Euskaldunak Euskal Etxeko kideek EuskalKultura.com-i. 'Baina mementu hartan ez genuen erantzunik jaso. Iaz, ordea, gure euskal etxea bisitatu zuen Iñaki Galdos diputatua oso interesatuta agertu zen proiektuaren berri eman genionean. Geroztik, Gipuzkoako Foru Aldundiak babesa ematea onartu du eta diru hori ezin estimatuzkoa izango da ekitaldiaren gastuei aurre egiteko'.

Berrogeita hamar haur inguruk hartuko dute parte Udalekuan. Euren artean, ahalmen bereziko umeak eta arrisku egoeretan bizi diren gazteak integratzea erabaki du Euskal Etxeak. Erakunde laguntzaileen artean, Chascomuseko Pilota Kluba, Club de Regatas elkartea, Bat Zenbakidun Udal Eskola eta Euskal Etxeko bazkide eta lagunen laguntza izango dute antolatzaileek umeak jasotzeko.

Euskal Herriko eta Argentinako begiraleak

Aldi berean, eta astebete iraungo duen egitaraua betetzeko, Euskal Herriko 'Eziko Udalekuak' elkarteko bost begirale etorriko dira Chascomusera. Euren esku egongo dira umeek egingo diren ekintzak, hala nola, jolasak, txangoak, kirolak eta eguneroko lanen antolaketak. Gainera, aipatu elkartearen helburu nagusia euskal kultura aisialdian hedatzea denez, euskal kulturarekin zerikusia dituzten ekimenak ere antolatuko dituzte.

Euskal Etxekoentzat harro egoteko modukoa da ekitaldi hau antolatu ahal izatea, Argentinan egingo den lehenengo Udalekua baita, ezaugarri hauetan bederen. Ekintzak urtarrilaren 4tik 11ra gauzatuko dira, 12 eta 16 urte arteko haurrei zuzendurik. 'Adin horietako umeak aukeratzeko zergatia xinplea da oso', adierazi dute Zingirako Euskaldunak-eko kideek. 'Txikiagoentzako ekintzak badaude, adibidez, Llavallolgo Euskal Echea Institutuak urtero antolatzen duen Txikien Topaketa. Helduagoentzat ere badaude, izan ere, Euskal Astea batez ere helduentzat da. Baina tarte horretako umeentzako ekintzarik ez dagoela ohartu gara. Eurak izango dira gure Udalekuko protagonista'.

Lotura interesgarriak

Eziko Udalekua
www.ezikoudalekua.net