euskalkultura.eus

Erroma, Italia. Datorren apirilaren 4ean Unai Elorriaga idazlea (Bilbo, 1973) Erroman izango da eta literatur irakurraldia eskainiko du San Lorenzo auzoko Giuffa liburudendan, Associazione Culturale Euskara euskal etxeak eta UPTER unibertsitateko Euskara eta Euskal Kultura sailak gonbidatuta. Idazle bilbotarrak harreman estua du Erromako euskal komunitatearekin; izan ere, sarri izan da hirian bere lanen italierara itzulpenak aurkezteko. Gran Via argitaletxeak Elorriagaren bi eleberri itzuli ditu orain arte: "Un tram a SP" eta "Le pianti, per esempio, no bevono caffellatte" (jatorrizko izenburua "Vredaman").

Erromako elkarte euskaltzaleek bere egitaraua Elorriagaren bisitaren arabera moldatu dute eta Giuffa liburudendan egin ohi duten Euskal Aperitiboa astebe atzeratu dute, Elorriaga bertan egon ahal izateko. Beti bezala, askari batekin hasiko da arratsaldea, 18:30tan, eta ondoren Elorriagak italierara itzulitako bere lanen pasarteak irakurriko ditu. Ondoren idazle bizkaitarrak ekitaldi honetarako idatzi duen testu berri bat ere aurkeztuko du.

Unai Elorriaga Bilbon jaioa da, 1973 urtean. Filologia ikasi zuen eta irakaskuntzan eta itzulpengintzan aritzeaz gain, hainbat hedabidetan kolaboratzen du. Egungo euskal literaturako idazlerik garrantzitsuenetako bat da eta Espainiako Narratiba Saria jaso izan duen idazlerik gazteena da.

Italiako Gran Via argitaletxeak Unai Elorriagaren bi eleberri argitaratu ditu: “Un tram a s.p.” eta “Le piante, per esempio, non bevono caffellatte".

Associazione Culturale Euskara elkartearen webgunea, hemen.