euskalkultura.eus

Viña del Mar, Txile. Hiriburu txiletarrean, Julian Celaya eta berarekin laguntzaile zihoan Andoni Martin bere saileko teknikaria, egoitza Vicuña MacKenna hiribidean daukan Euzko Etxea Euskal Etxera hurbildu ziren, euskal elkarteko zuzendariekin bildu eta euskaldunek bertan dauzkaten instalazio ederrak bisitatuz, Eusko Jaurlaritzako Kanpoko Euskal Gizataldeekiko zuzendari berriak herrialde honetara egiten duen lehenengo bisitan.

[Julian Celaya Viña-Valparaison antolatu zioten harrera ekitaldira etorritako gizonezko talde batekin, Txilera egindako lehenengo bisitan, 2009ko urriaren 27an]

Ondoren, autoa hartuta, kostalderaino doan errepidea hartu eta Txileko bigarren euskal etxeko kideak bisitatzera abiatu ziren. Asteartea zen, urriaren 27a eta Bosgarren Erregioko Eusko Etxea Euskal Etxeak, Archibaldo Uriarte lehendakaria buru, propio antolatutako ongietorri ekitaldi bero batera gonbidatu zituen.

Valparaisoko euskaldunekin berbetan

Ongietorri hitz goxoak eskaini zizkion Celaya zuzendariari Archibaldo Uriarte Eusko Etxea-ko lehendakariak. Elkartearen historia luzea laburbildu zion, gaur eguneraino helduz eta egun bertako euskal gizataldeak dauzkan erronkak aipatuz. Uriartek, historia hori biltzen duen Arrojos, dichas y nostalgias. Vascos en el Valparaíso del siglo XX liburuaren berrargitalpena iragarri zuen. Obra hau, Rubila Araya Ariztia kazetariak Eusko Etxearen babesean idatzia, Txile independentea sortu zeneko bigarren mendeurreneko ospakizunen testuinguruan nahi luke berrargitaratu Uriartek.

[Julian Celaya Valparaisoko 'Club Naval' delakoan egindako harrera ekitaldian parte hartutako zenbait jenderekin]

Eusko Etxea-ko lehendakariak, izan ere, Urazandi bilduman plazaratuta dagoen liburu horren kopia bat eman zion opari Julian Celayari, baita ere Euskadi, la tierra de nuestros ancestros euskal gaiko margolan eta eskulturak bildu zituen erakusketako erregistro bat, hau ere Valparaisoko Eusko Etxeak gauzatua, azken hilabeteotan, Maria Luisa Sainz Aguirrezabal eta Laura Rojas Zubieta kudeatzaile.

Euskal gizataldeko eta gonbidatuak solasaldi luze eta ireki batean sartu ziren, bazkaldu ondotik seiak joak ziren arte. Aipatutako agintariez gain, harrera ekitaldian parte hartu zuten, besteak beste Eugenia Zamudio Isla Negrako 'Pablo Neruda' Museoko zuzendari ohiak edo, esaterako, Valparaisoko Eusko Etxea-ko hiru belaunalditako kideak, tartean  Begoña Magunacelaya, Ana Maria Garrido, Edurne eta Arantzazu Elorriaga, Manuel Jesus Uriarte, Francisco Pinedo edo Gustavo Ossa.

Lotura interesgarriak

Santiagoko Euzko Etxea
www.euzkoetxeachile.cl

Viña-Valparaisoko Eusko Etxea
www.euskoetxea.cl

Txileko euskaldunak eta bertako erakundeak
http://www.euskonews.com/0072zbk/gaia7204eu.html

Vascos en el Valparaiso del siglo XX
http://www.euskonews.com/0382zbk/kosmo38201.html