euskalkultura.eus

euskal diaspora eta kultura

Albisteak rss

Ttarttalok gazteleraz plazaratu du Pulitzer Sarirako izendatua izan zen Laxalten The Basque Hotel eleberria

2007/10/31

Henrike Knorr, euskaltzaina; David Rio, itzultzailea eta literatura irakaslea EHUn; eta Idoia Arozena, editorea, atzo Donostian egindako aurkezpenean
Henrike Knorr, euskaltzaina; David Rio, itzultzailea eta literatura irakaslea EHUn; eta Idoia Arozena, editorea, atzo Donostian egindako aurkezpenean

PUBLIZITATEA

David Río Euskal Herriko Unibertsitateko Ipar Amerikako Literatura katedratikoak gazteleratu du Robert Laxalten The Basque Hotel eleberria. Estreinekoz 1989an argitaratu zen liburu honekin idazle euskalamerikarra Pulitzer sari famaturako izendatu zuten. Liburu autobiografikoa hein handi batean, The Basque hotel-ek bigarren belaunaldiko gazte euskal amerikar baten bizitza kontatzen du. Liburua Ameriketako euskal emigrazioari buruzko trilogia bateko lehen zatia da.
Ttarttalo argitaletxeak atzo aurkeztu zuen Donostian Robert Laxalten The Basque Hotel eleberriaren gaztelerazko itzulpena. David Río Euskal Herriko Unibertsitateko Literatura Ipar Amerikarreko katedradunak egin du itzulpena. Atzo aurkezpenean Henrique Knörr, Euskal Filologia katedraduna eta Idoia Arozena editorea izan zituen alboan.

EuskalKultura.com-i eginiko adierazpenetan Ríok eleberriaren balioa azpimarratu zuen: 'Alde batetik hastapen istorio unibertsal bat kontatzen du, haurtzarotik heldutasunerako bidearena; eta bestetik istorio partikular bat ere agertzen du, AEBtako euskaldunena'. Liburuak Laxalt beraren bizipenak ditu oinarrian eta bigarren belaunaldiko gazte euskalamerikar baten istoria kontatzen du: hasieran ez ditu bere kultur jatorri eta ondarea ezagutu nahi eta ezkutatzen ere saiatzen da, amerikar gizartean azkarrago integratu nahian. Narrazioa aurrera joan ahala bere jatorria maitatzen ikasiko du.

'Hemingway-ekin alderatzen dute'

'Laxalten narrazioen erritmoa dinamikoa da eta prosa sinplea, baina irakurlea testuan murgiltzen denean, deskribapenetan adibidez, poetikoa, lirikoa da. Aditu batzuk Laxalten idazteko era Hemingway-enarekin alderatzen dute, sinplea ematen duen arren oso landua delako', azaltzen du Ríok.

Liburua 1989 argitaratu zuten eta Pulitzer sari ospetsuetarako izendatua izan zen. 'Balio soziokulturala ere badu, amerikar gizartea eta bigarren belaunaldiko emigrante euskaldunen esperientzia islatzen dituelako', azaltzen du David Ríok. [Ezkerreko irudian Robert Laxalten The Basque Hotel eleberriaren gaztelerazko bertsioaren azala]

30.000 ale saldu ditu aurten AEBtan

Liburua argitaratu zenetik Estatu Batuetako emigrante askok bere egin dute Laxaltek kontatzen duen esperientzia eta idazlearen lanek gaurkotasuna dute egundaino, Ríoren aburuz. 'Aurten, Estatu Batuetan bakarrik, Laxalten Sweet Promised Land elaberriaren 30.00 ale saldu dituzte, eta liburuak 50 urte dauzka.

Itzultzailea Nevadan izan zen joan den irailean Renoko Center for Basque Studies-en, bere beste liburu bat, Robert Laxalt: The Voice of the Basques in American Literature liburua aurkezteko. Bertan ikusi ahal izan zuen komunitate emigrante desberdinetako kideen interesa, bere hitzaldietako entzuleen artean talde askotako ordezkariak zeudelako, aipatu duenez.

Trilogia osoa argitaratzeko gogoa

Gazte baten istorioa kontzatzen badu ere, Rioren esanetan The Basque Hotel-ek gaztaroaz haratago egiten du eta irakurlego zabalagoa du. 'Robert Laxaltek barrez gogoratzen zuen New Yorkeko Liburutegiak gazte literatura arloko sari bat eman ziola liburu honengatik. "Zati erotiko xamarra ere badu-eta!", esaten zuen. Liburuak gurasoen istorioa, kontrabandoa, mendebaldeko euskal ostatuetako bizimodua... gai asko aipatzen ditu'.

The Basque Hotel Indart familiari buruzko trilogiaren lehen zatia da. Besteak Child of the Holy Ghost ('Izpiritu Santuaren alaba' --bere amaren istorian oinarrituta-- alaba natural baten bizitza Euskal Herrian) eta The Governor's House ('Gobernadorearen etxea', familiaren goratzea politikan --Laxalten anaia Paul Nevadako gobernadore eta senadorea izan zen). 'Aurrerago trilogiaren beste atalak argitaratzea espero dugu, bai gazteleraz eta baita euskaraz ere', azaldu du Ríok.


Lotura interesgariak

David Ríok Robert Laxalti buruzko liburua aurkeztu du Renon
EuskalKultura.com-en argitaratua 2007ko urriaren 4ean

Sweet Promised Land-en 50. urteurrena
EuskalKultura.com-en argitaratua 2007ko uztailaren 27an

Heidi Añarbe nevadatarrak 'Kaixo Amerika' liburua eman du argitara
2006ko abenduaren 11ean argitara emana

Zenbait idazle euskalamerikarrek euren lanak aurkeztu dituzte
2005eko abenduaren 8an argitara emana

Monique Laxalt eta bere A Sweet Blue Memory-ren euskal bertsioa
2004ko urriaren 20an argitara emana


« aurrekoa
hurrengoa »

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia