euskalkultura.com

euskal diaspora eta kultura

Albisteak rss

Bere II Argazki Lehiaketa antolatu du Sao Pauloko Eusko Alkartasuna Euskal Etxeak: ikus oinarriak eta parte hartu!

2017/09/21

Bigarren edizioa du iaz hasi zen Sao Pauloko euskal-brasildar egutegi eta lehiaketa honek

Bere II Argazki Lehiaketa antolatu du Sao Pauloko Eusko Alkartasuna Euskal Etxeak: Gaia "Euskal diaspora" delarik, euskal etxeetako kideak eta euskal diasporako edozeinek har dezake parte, gaiari loturik. Ian ere, antolatzaileek munduko euskal etxe eta komunitateetako jardun eta errealitateak nahi lituzkete bildu eta islatu. Hobekien baloratutako argazkiak Eusko Alkartasunaren 2018ko paperezko egutegia egiteko erabiliko dira. Epea parte hartzeko, urriaren 10a. Ez denborarik galdu eta animatu!

Gehiago irakurri...


Saladilloko Carlos Zarragoicoechea 55 ordu eta 4 minutuz ibili da bizikleta gainean, bertako errekorra hautsiz

2017/09/21

Carlos "Caia" Zarragoicoechea, marka berriaren jabea

Berri ugari iritsi zaizkigu azken egun hauetan Saladillo hiriko Itxaropen Euskal Etxetik. Auzoko eskola bateko ikasleen bisita, Euskal Zine Zikloaren saio berriak, Loiolako San Inazioren irudiaren tronuratzea... Baina bitxiena, dudarik gabe, herriko errekor bati dago lotuta. Carlos "Caia" Zarragoicoechea 55 ordu baino gehiago ibili da bizikleta gainean Saladilloko plaza nagusiaren inguruan eta 1977. urtean ezarritako marka bat hautsi ahal izan du.

Gehiago irakurri...


Igor Yebra bilbotarra proposatu dute Uruguaiko Sodre Ballet Nazionaleko zuzendari, egungo Boccaren lekukoa hartzeko

2017/09/20

Juan Mari Arzak Igor Yebrarekin Madrilgo El País-ko Smodak duela gutxi argitara emaniko erreportaje batean (arg. Gianfranco Tripodo)

Uruguaiko Sodre Ballet Nazionalak zuzendaritza artistiko lanpostua eskaini dio Igor Yebra dantzari euskaldunari. Erabakia behin betikoa ez bada ere, baletaren gidaritzan zapi urte zeramatzan Julio Boccaren lekukoa hartuko luke horrela Yebrak, Latinoameriketako ballet prestigiotsuenetako batetan. Dantzariak agertu du dagoeneko, soilik bere izenaz oroitzea ardura horretarako eta proposamena bera hartu izana ohore handi bat dela dantza arloko edozein profesionalentzat.

Gehiago irakurri...


Bertsolaritza Kultur Intereseko Ondasun izendatuko du Nafarroako Gobernuak, goreneko babes maila emanez

2017/09/20

Bertsolarien Elkarteko webguneak berehala islatu du Nafarroako Gobernuak atzo adierazitako pausoa

Nafarroako Gobernuak kultura-intereseko ondasun deklaratuko du bertsolaritza, ondasun ez-material gisa, Nafarroako Bertsozaleen Elkarteak egindako proposamenari jarraiki. Ondorioz, Kultur Ondareari buruzko Foru Legean adierazitako goreneko babes maila jasoko du, aurten bertan. Sei izanen dira honela Nafarroako kultura intereseko ondasun deklaraturiko elementuak: Lanzko inauteria (2009), Ituren eta Zubietako inauteria (2009), Hiru Behien Zerga (2011), Luzaideko bolantak (2012) eta Cortesko paloteadoa (2014).

Gehiago irakurri...


Bonbardaketaren 80. urteurrena: Gogoetarako Euskal Katedra Askea antolatzaile, UNLPko Hari Laukoteak ‘Guernica’ suitea eskaini du (bideoa)

2017/09/19

‘Gernika: iruditik soinura’ La Platako Pasaje Dardo Rocha Kultur Gunean

Bonbardaketaren 80. urteurreneko urtearen baitan,‘Gernika: iruditik soinura’ jarduera antolatu dute La Platako Unibertsitateko (UNLP) Gogoetarako Euskal Katedra Askeak eta hiriko Euzko Etxea elkarteak. Hiru zatitan banatua, Picassoren koadroa hartzen du ardatz musika-lanak. Eskainitako programan, pinturari buruzko hitzaldi bat eskaini zuen lehenik Jose Saldias adituak eta bere musika pieza aurkeztu zuen ‘Guernica’ suitearen egilea den Maximo Pujol maisuak, Unibertsitateko Hari Laukoteak suitea jo aurretik.

Gehiago irakurri...


Bartzelonako Euskal Etxea administratzaile baten bila dabil, erakundeko lan-taldean integratzeko

2017/09/18

Bartzelonako Euskal Etxea elkarte dinamiko, ekimentsu eta engaiatua da euskal kulturarekiko eta bere inguru katalanarekiko

Bartzelonako Euskal Etxeak abisua plazaratu du bere lan-taldean integratzeko administrari baten lanpostua eskaintzeko. Etxeko kontularitza eta administrazioa eramango luke, lanari dagokion titulua beharko luke, antzeko postuetan eskarmentuduna izan eta gaztelaniarekin batera, euskara eta katalana jakitea balioetsiko da. Goizez lan egiteko da eta ekimena, motibazioa eta talde-lanean aritzeko gogoa aintzakotzak hartuko dira oso. Proposamenak irailaren 25eraino (datorren astelehena) jasoko dira.

Gehiago irakurri...


Ushuaiatik Misionesera Argentina osoko euskal etxeak Immigrantearen Eguna ari dira ospatzen irailean

2017/09/18

Comodoro Rivadaviako Galtzagorriak hiriko 30. Gizatalde Jaian

1949. urtean Gobernuak ezarritako dekretu bat medio, irailaren 4an Immigrantearen Eguna ospatzen dute argentinarrek herrialde osoan. Egun horri lotutako jaialdiak, ordea, hilabete osora luzatzen dira, tokian tokiko hamaika kolektibitate eta udal antolatzaile. Aurtengo ospakizunek berritasunik ekarri dute, baina, euskaldunen kasuan: Ushuaiako Kolektibitateen Jaira lehenengo aldiz bertaratu dira, eta beste puntan, Misionesen, bat egin dute, esaterako, Oberan, Posadasko eta Corpus-ko euskal etxeetako partaideek.

Gehiago irakurri...


Eusko Brasildar Etxearen Argentinako Euskal Astera eta Txileko Santiagora joateko planak, eta Euskal Herrira, Maizpiden sartzeko

2017/09/15

Sao Pauloko Eusko Brasildar Etxeko kideak irailaren 2an euren egoitzan egin zuten bilkura eta paella-jatean

Planez --plan anbiziotsuz-- ongi hornitua dabil Sao Paulon bertako Eusko Brasildar Etxea. Oskar Goitia buru duen elkarteak asmo handiak dauzka datozen hilabeteetarako, hasteko azaro hastapenean Argentinako Euskal Aste Nazionalera, San Nicolasera, talde gisa bidaiatzea, aurreko edizioetako batzuetan egin legez. Asmoak, baina, areago doaz, Txileko Santiagorako bidaia era badaukate-eta buruan eta, azpimarragarria, 2018an Euskal Herrira bidaiatzea, Maizpidera, euren euskarari bultzada erabakiorra ematera.

Gehiago irakurri...


Maria Valeria Aramburuk ‘Nire etorkin sustraiak’ literatur lehiaketa irabazi du eta Euskal Herria bisitatuko du

2017/09/15

Maria Valeria Aramburu ‘Mis raíces inmigrantes’ literatur lehiaketaren saria jasotzen (argazkia El Diario de Tandil)

Aurkeztutako 85 idazlanen artean Maria Valeria Arambururen “El mar en sus ojos” (Itsasoa bere begietan) izeneko ipuina hautatu zuten aho batez lehiaketako epaileek. Irabazlea, poz pozik dago bi arrazoiengatik; errekonozimendua baita euskal gizataldearentzat oro har, eta saria, jatorrizko herrira bidaiatzeko bi txartel direlako. “2018ko Argentinako neguan joango naiz Euskal Herrira, nire alaba Begoñarekin” jakinarazi dio Valeria Aramburuk EuskalKultura.com-i.

Gehiago irakurri...


Complutense Unibertsitateko ikasle guztiek lor ditzateke euskara kredituak: Josu Bergararen kantaldi batekin ospatuko dute gaur

2017/09/14

Josu Bergara kantari eatarrak kontzertua eskainiko du gaur Madrilen

Josu Bergara kantari eatarrak emanaldia eskainiko du gaur Madrilgo Complutense Unibertsitatean (UCM) eta bertan bere azkeneko lana, "Kanta txikien indarra", aurkeztuko die bertaratzen diren euskaltzale eta musikazaleei. Ekitaldia unibertsitate madrildarreko Taupaka elkarteak antolatu du eta ospakizun berezia ere izango da, bildutakoek euskara ikasten duten UCMko ikasle guztiek aurrerantzean kredituak lortuko dituztela ospatuko baitute.

Gehiago irakurri...


© 2014 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.com

jaurlaritza gipuzkoa bizkaia