euskalkultura.eus

Santiago, Txile. Akordioak islatzen duenez, EITB eta Eusko Jaurlaritzaren Santiagoko Ordezkaritza bat datoz atzerrian Euskadiren irudi garaikidea erakusteko ahaleginean, batez ere Txilen bezala euskal presentzia garrantzitsua duten herrialdeen kasuan. “Txile, Kolonbia eta Venezuelako 700.000 etxetara izango dugu sarbidea, Euskadi moderno eta berritzailea erakusteko; izan ere, gure irudia, gure kultura, gure hizkuntza, gastronomia, kirolak… indartu eta proiektatu nahi ditugu”. Hauek izan ziren EITBko zuzendariaren hitzetako batzuk, Santiagora bidaiaturik akordioa bertako Telefonicako zuzendaritzakoekin sinatzeko.

Sinatze ekitaldira bildu ziren, beste zenbaiten artean, Europar Batasuneko Txilerako Ordezkari Jaime Perez-Vidal; Espainiako Enbaxadako ministro kontseilari Nabor Garcia; Telefónica-Txileko zuzendari Claudio Muñoz; Valparaísoko Eusko Etxeko lehendakari Archibaldo Uriarte eta  Santiagoko Estadio Españoleko Euskal Gizataldeko presidente Imanol Carredano. Ez Santiagoko Euzko Etxeko ordezkaririk.

Ahalegin-metatze berri honen arduradunak pozarren eta esker oneko agertu ziren bi aldeei onurak ekarriko dizkien akordioarekin; batetik, Telefónica, eduki eta programazioaren hazkundean laguntzen diolako, eta bestetik, ETB, zinez laguntzen baitio bere zerbitzuak Diasporari helarazten, kanpoko euskaldunen arteko informazio eta kultura loturak estutuz.