Gure Txoko elkarte australiarrak Sydneyko badian ontzi-txangoa eginez ospatu zuen 45. urteurrena

2012/03/02

Gure Txoko Euskal Etxeko zenbait kide Sydneyko badian egin zuten txangoan (argazkia SydneyEE)

PUBLIZITATEA

Gure Txoko euskal etxe australiarrak 45 urte bete ditu aurten eta urtemuga ospatzeko elkarteko kide talde batek ontzi-txango bat egin zuen Sydneyko badian. Berrogei bat lagun bildu ziren ekitaldira eta egun bikaina pasa zuten, ganba eta ostra-ko menuaz gozatuz. Horrez gain, elkarteak euskarako klaseak berrabiarazi ditu, Gabonetako geldialdiaren ostean, Ugutz Tornes irakaslearen gidaritzapean. Datozen asteetako ekitaldien artean aipagarriak dira igande honetan elkarteak Sebastian dantzari mauletarrari egingo dion agurra -Euskal Herrira bueltatzen da Sydney-n bi urte eman ondoren-- eta apirilean, Aberri Egunaren ospakizuna.

Sydney, Australia. Sydneyko Euskal Etxeak bere sorreraren 45. urteurrena ospatu zuen iragan otsailaren 11ean, hiriko badian zehar egin zuen bazkari batekin. Bazkaria badia zeharkatzen duen ontzietako batean egin zuten eta menua ez zen nolanahikoa izan: ganbak eta ostrak, urteurrena "behar den moduan" ospatzeko.

Giroa bikaina izan zen eta elkarteko kideek biziki gozatu zuten eguna. Denen gogoan izan ziren iaz zendu ziren elkarteko bi erreferente: Carlos Orue, urte askoan elkarteko lehendakari izan zen zornotzarra, eta Rafa Alegria, elkarteko idazkari eta zuzendaritza kide izan zen hondarrabiarra. Partehartzaileen artean izan zen Gure Txokoko egungo presidentea, Ruben Alvaro, urte hasieran egin zen bilkura orokorrean berriz ere elkarteko buru hautatua.

Sydney 45. Urteurrena (2)

[Gure Txokoko bazkide batzuk, ontzian egin zuten bazkaria hastear (argazkia SydneyEE)]

Datozen jarduerak

Hurrengo asteetako ekitaldiei dagokienez, elkarteko iturriek EuskalKultura.com-i azaldu diotenez, igande honetan Mauleko Sebastian bazkideari agur-afaria egingo diote. Sebastian dantzari profesionala da eta Sydneyn bi urte igaro eta gero, etxera bueltatuko da aurki. "Euskal dantzak izango ditugu eta euskara ikasleak kantak prestatzen ari dira Sebastiani agurra emateko. Egun handia izango da", azaldu du Zaloa Arrieta bazkideak.

Elkartea martxoaren 19an San Patrick eguna ospatzekotan da baita ere. Hurrengo ekitaldia, urtero bezala, Aberri Eguna izango da, Aste Santuan. Gure Txokok, ohi duen legez, Centennial parkean aire zabalean egingo den piknik batekin ospatuko du.

Manu Chaorekin

Azkenik, aipatu iragan urtarrilaren 7an elkarteko kide batzuk Manu Chao musikariak Sydney-en eman zuen kontzertuan izan zirela, elkartearen ordezkari bezala. "Manu Chaok Gure Txokoko jendea gonbidatu zuen bera ezagutzera, Euskal Herriarekin duen harremanagatik eta Fermin Muguruzarekiko adiskitasunagatik", azaltzen du Zaloa Arrietak. "Azkenean, talde handi bat joan ginen, Gure Txokoko kamiseta eta guzti". Manu Chao eta taldekideak Gure Txoko kamiseta banarekin joan omen ziren hiritik.

Sydney Gure Txoko Manu Chao