euskalkultura.eus

Mendoza, Argentina. Ia hamar urte daramatzate Txile (1) eta Argentinako (5) Nafar Etxeetako dantzariek Nafarroako Gobernua babesle, hemengo udan antolatzen den Dantzen ikastaroan parte hartzen. Aurtengo edizioan, Mar del Plata, Bolivar, Buenos Aires, Rosario, Txile eta Mendozako bertako dantzariak apuntatu dira. Entseguak gogor samarrak izan dira. Izan ere, bederatzigarren elkartze honetan sartzeko baldintzaren bat aurrekoetara etorri izana izan da. 'Ikastea baino gehiago ikasitakoa hobetzea da ikastaroaren helburua', azaldu du Bolivarreko dantza irakaslea den Valeria Lozanok.

Automovil Club Argentinoko aretoan egin dira goizeko nahiz arratsaldeko saioak, eta otorduak Nafar Etxeko egoitzan. Baina lana ez da ekintza bakarra izan astean zehar. "Asteazkenean atseden hartu dute gazteek eta finca batera eraman ditugu eguna pasatzera. Asadoa jan eta igerilekuaz gozatu ziren', adierazi dio Mendozako Nafar Etxeko presidentea den Esteban Nietok EuskalKultura.com-i. 'Horretaz gain, beste egun batean, Belasco de Baquedano Ardandegia ezagutzera joan ginen', zehaztu du.

Ikastaroa dantzaldi batekin bukatuko da, bihar, larunbata. Ikuskizuna Mendozako Selectro Antzokian izango da, Capitan de Fragata Moyano eta 9 de julio kaleetan. Dantzaldiaren ondoren, bisitari guztiak eta etxeko kideak gonbidatuta daude afaria partekatzera.