euskalkultura.eus

Santiago, Txile. Santiagoko Euzko Etxeak eta hiriburu txiletarreko euskal gizataldeak euskal egutegian, eta bereziki euskal-txiletar egutegian tradizio handikoa den 'Mikel Deuna' eguna ospatu dute aurten ere, bertako tradizioak agindu bezala meza bat entzunez Santiagoko Cerro San Cristobal izeneko muinoan, eta ohoratze ekitaldi bat eginez hor dagoen Euzko Enparantzan eta euskal esparru horretako buru den Gernikako Arbolaren kimuaren aurrean, zazpi probintzietako harmarriak arbola inguratuz, eta euskal dantzariak eta kantariak enparantza euren kantu eta jauziekin edertuz, publikoaren txalo eta esku-zarten artean.

[Arku dantza: Maitane, Virginia, Constanza eta Beatríz (argazkiak Berriketari)]

Urtero bezala, Santiagoko Euzko Etxeko Euskal Abesbatzako kantariek eta euzko elkarte bereko Itxaropen Gaztea-ko dantzariek kolorez jantzitako omenaldi polita burutu zuten, euskal gizataldeko ikusle eta partaideak lekuko, eguna parke nazional eder honetan pasatzera gerturatutako turista eta bisitariekin batera.

[Zamazain, Mikel Andoni Zuloaga]

['Paella zoragarriaren egileak', Martín Astorquiza buru (argazkiak Berriketari)]

Cerro San Cristobal delakoan gauzatutako ikuskizunaren ondotik, hitzorduak Euzko Etxearen egoitzan jarraitu zuen, Zuzendaritza Batzordekoek prestatu arazitako paella gozagarri bat dastatuz. Eguna, lagun artean dantzaturiko fandangoekin bukatu zen.