euskalkultura.eus

Posadas, Argentina. Argentina osoa oinez eta orga bat lagun bakartzat hirutan zeharkatu zuen Guillermo Larregui iruinsemea Misionesen dago ehortzia, bertan eman baitzituen bere bizitzako azkeneko urteak. 'El Vasco de la carretilla' deitzen zuten Guillermo Larregui-ren izena hartu zuen Chacabucoko Euskal Etxeak, eta Chacabucotik etorri da Posadasera Mundo Vascoko zuzendaria Luis Aramburu. Patagonia ia muturreko Santa Cruz probintziatik, berriz, 'Gora Vasco!' filmaren egile eta ekoizleak, Arizmendi anaiak. Azken hauteskundeen ondotik, gainera, anaietako bat, César Arizmendi, probintzia austral horretako euskal etxeko lehendakari da.

[Omenaldia Guillermo Larregui 'Orgaren euskalduna'ri ehotzia dagoen hilerrian. Ezkerretik eskuinera, Jose Gorgues, Larregui-ren auzo eta lagun izan zena; Marcela Gonzales, Iguazu-ko Kultura zuzendaria; Luis Aramburu, 'Mundo Vasco' aldizkariko zuzendaria; eta Roberto Arizmendi, Gora Vasco dokumentaleko zuzendaria]

Horiekin batera, anfitrioi, Misiones probintziako Corpus Christi herriko Eusko Etxekoak, Olga Leiceaga buru. Guztiak hartu dute parte, bertako erakunde publikoetako ordezkariekin batera, Guillermo Larreguiri egin zaion omenaldi honetan. Zenbait bisita egin zaizkio Larregui ibili zen lekuetara eta bera ehortzia dagoen hilerrira baita ere. Hiru emanaldi ere izna ditu filme dokumentalak, Posadas, San Ignacio eta Iguazú-n, hain zuzen.

Ekitaldiotara ez dira faltatu iruinseme ibiltaria ezagutu zuten batzuk, hala nola José Gorgues, haren auzo eta laguna. Hitz batzuk ere esan zituen. Plaka bat ere inauguratu zen Larregui-ren hilobian ekitaldiotako oroigarri. Argentinako Chacabuco eta Santa Cruzetik bertaratu ziren gonbidatuek bereziki nahi diote eskertu bere abegikortasuna Corpuseko Eusko Etxeari eta horko presidente den Olga Leiceagari, baita ere Misionesko erakunde publikoetako kideei eta ekitaldiok erakarri zuten publikoari euren presentzia. Honi buruzko kronika zehatza bilduko du Mundo Vascoko hurrengo aleak.