Santa Agedaren koplak eta danborrada Madrilgo kaleetara heldu dira Euskal Etxeari esker (ikus bideoak)

2011/02/10

Santa Ageda eskean Puerta del Sol-en (argazkia MadrilEE)

PUBLIZITATEA

Madrilgo Euskal Etxeko kideek azken aste hauetako hotzari entzungor egin eta hiriko kaleetan ibili dira bi euskal tradizio ezagun ohoratzen: Santa Ageda eskean eta Danborrada txikiarekin. Elkarteko korua Madrileko erdigunean kantari ibili zen joan den otsailaren 4an eta "Aintzaldu daigun Agate Deuna..." bezalako koplek zur eta lur utzi zuten Puerta del Sol-etik zebilen bat baino gehiago. Aurretik, urtarrilaren 23an, elkarteko txikiak izan ziren protagonista, danborradaren burrunbarekin. Jarraian, bi ekitaldion bideoak ikusgai.

Madril, Espainia. Madrileko Euskal Etxeko korua espainiar hiriburuko kaleetan ibili zen joan den ostiralean, otsailaren 4ean, Santa Ageda eskean. Ibilbidea San Nicolas plazan hasi zen, Txoko Zar elkartean indarra hartzeko mokautxo bat jan ostean. Ondoren kantariak Plaza Nagusia, Puerta del Sol eta Plaza Santa Ana bezalako taberna eta jatetxe ezagunetan zehar ibili zen, makila eskuan eta baserritar jantzita. Euskal elkarteko orfeoiko kide askok parte hartu zuten ekitaldian, baina interesa zuen edonork har zezaken parte.

Eguraldiak lagundu egin zuen, ez baitzuen euririk egin, eta hotzari aurre egiteko kantariek Miau, Kupela eta Zerain tabernetan geldiuneak egin zituzten, zer edo zer edan eta barruak berotzeko. Jaia Euskal Etxean bukatu zen (Jovellanos, 3), txistorra eta ardo dastaketa batekin.

[Euskal Etxeko korua Puerta del Sol-en kantari (argazkia MadrilEE)]

Danborrada txikia

Bi aste lehenago gauzatua, madrildar elkartearen beste ekitaldi ezagun bat urtero elkarteko txikiek egiten duten danborrada da. Aurten urtarrilaren 23an atera zen danborrada eta gaztetxoek euskal etxearen aurrean egin zuten emanaldiak guraso eta elkarteko nagusiak biziki hunkitu zituen. Badago datozen urteetarako harrobirik!