Boiseko eta Madrilgo euskaldunak Santa Ageda Eguneko koplak kantatzen aterako dira asteburuan

2012/01/30

Iazko irudian, Madrilgo Euskal Etxeko korua Puerta del Sol gune ezagunean Santa Ageda eguneko koplak abesten (argazkia MadrilEE)

PUBLIZITATEA

Otsailaren 4ean Santa Ageda eguna da eta Euskal Herriko herri eta auzo askotan etxez-etxe ibiliko dira kantuan makina bat koru, elkarte edo horretarako bildutako bizilagun taldeak. Diasporan ere antolatu dituzte horrelako zenbait ekitaldi: Estatu Batuetan, adibidez, Boisen Ikastolako umeak izango dira kantariak ostiral honetan, eta bertara joan ezin duenari kantatzeko bigarren aukera bat emango diote datorren astelehenean, euskara ikasleekin batera. Madrilen Euskal Etxeko koruak urtero legez espainiar hiriburuko zentroan egingo du ibilbidea larunbatean bertan, eta Puerta del Sol eta Plaza Nagusia bezalako gune ospetsuetatik igaroko da.

Donostia-San Sebastián. Azken urteetako ohiturari jarraiki, Boiseko euskal komunitateak Santa Ageda eguna kantari ospatuko du, Boiseko Ikastolak eta euskara ikasleek antolatutako ekitaldietan. Ostiral honetan bertan egingo dute lehendabiziko ospakizunak Ikastolako neska-mutilek, euren gurasoek eta irakasleek. Goizeko hamarretan dute hitzordua, Ikastolan bertan, eta nahi duenak parte har dezake.

Ostiralean bertaratzerik ez dutenentzako, bigarren aukera bat izango da datorren astelehenean, otsailaren 6ean. Boiseko euskara ikasleek antolatuta, Euskal Museotik aterako da taldea, arratsaldeko zazpietan, eta hiriko Basque Block delako euskal guneko tabernatan ibiliko da kantari, kopla zaharrak abesten.

Madril erdigunean ere

Madrilen ere urtero ospatzen du Euskal Etxeak Santa Ageda eguna, eta korua espainiar hiriburuko erdigunean barrena ibiltzen da beti euskal kantu erakustaldia eskainiz. Aurten Santa Ageda egunean bertan, larunbatean, egingo dute ekitaldia eta nahi duenari bat egiteko gonbitea luzatzen diete. Hau izango da ibilbidea:

•19:00. San Nicolas Plaza (Txoko-Zar)

•19:15. Plaza de la Villa

•19:35. Sacramento kalea

•19:45. Plaza Nagusia

•20:00. Puerta del Sol

•20:15. Santa Ana Plaza

•20:30. Quevedo, 3 (Zerain)

•20:45. Marqués de Cubas (Kupela)

•21:00. Euskal Etxea (Jovellanos, 3)