euskalkultura.eus

San Miguel, Argentina. A Gripe epidemia dela-eta bolada zaila bizitzen ari dira argentinarrak, baina hori ere ez da oztoporik izan Askatasunaren Bidea taldekoentzat euren lehendabiziko topaketa egiteko. Hotza gorabehera, berrogei bat lagun hurbildu ziren uztailaren 11ean San Miguel hiriko erdigunera, tartean María Elena Etcheverry, hiriburuko Eusko Kultur Etxea-ko lehendakaria; Teresa de Zavaleta, Buenos Aireseko Euskaltzaleak-eko lehendakaria; eta César Arrondo, Arturo Campion' Euskal Kultura eta Abertzaletasunaren Ikasguneko kidea; baita ere, bistan da, talde berriko sortzaile direnak: Mariana Fernandez Castelli, Maria Jesus Andres Zarandona, Elba Reggi, Nestor Fernandez, Itziar Mohr, Cesar Mohr, Nerea Mohr eta Horacio Marotto Etxezahar.

Joan den larunbatean, beraz, eta bostak aldera, ekitaldia girotzeko, taldeko gazteenek, Itziar eta Nerea Mohrrek, euskal dantza batzuk egin zituzten. Jarraian, Koldo Zabalondok ‘Haritza Euskal Herriko Historian’ izeneko hitzaldia eman zuen, eta bukatzeko, mintzalariak eta antolatzaileek opariak eman zizkieten elkarri.

Mintzaldi osoan zehar, Zabalondok azaldu zuen Euskal Herriko historian, haritzak izan zuen garrantzia, politika arloan nahiz eguneroko bizitzan. Baserriei buruz ere mintzatu zen arotz euskalduna, eta horrekin lotuta maiorazkoaz. 'Normalean pentsatzen da maiorazkoa dela eta, etxetik kanpora joan zirenek, Ameriketarara, adibidez, asko galdu zutela', esan zuen Zabalondok. 'Eta hori egia da. Baina guk ere asko galdu dugu, zuek gabe geratu garelako. Eta Diasporak Euskal Herria behar du, bai, baina guk ere zuen beharra daukagu', esan zuen.