euskalkultura.eus

San Juan, Argentina. Ekitaldia San Inazio egunean berean egin zen, aurten larunbatez, bazkideak meza esker-emaile batera deituz "geure zaindariaren eguna ospatu eta hartutako mesedeak eskertzeko", eta "hildako bazkideak gogoan atxikitzeko". Azkeneko asmo hau, elkartearen fundatzaileetakoa izan zen aita Jose de Aramburu bereziki oroituz gauzatu zen.

Aita Martin Retak eman zuen meza, eta besteak beste lan inaziotarraren nortasuna eta balioak azpimarratu zituen, eta horiekin batera baita Eusko Etxea sortu zutenena ere, elkartu zirelarik "Euskal Kultura sustatu eta zabaltzeko, San Juango herritarren artera hurreratzeko".

Eusko Etxeko lehendakariak, Esteban Marticorenak, opari gisa aita Jose Arambururen familiakoei, 1952ean hasi berria zen euskal elkartearen legeztatzeko eskabide dokumentuaren kopia bat eman zien, eskatzaileen artean, euren erroak ongi sustraitu eta elkartekideen seme-alaba eta biloben artean hazten eta loratzen ikusi nahi zituen jende talde haren lehendakariorde gisa, aita Arambururen sinadura dagoela.