euskalkultura.eus

San Frantzisko, Kalifornia, AEB. Ekitaldi berezia joan den asteartean South San Frantziskoko Basque Cultural Center-ean bizi izan zutena, ez baita eguneroko gauza zeure etxea Estatu Batuetako presidenteak bisitatzea. Bertakoak, beraz, gogor saiatu ziren azken orduan --Clintonen agenda agintari-- finkatutako hitzordu hau behar bezala aurrera ateratzen, zehaztuz, hori bai, hitzordua hitzordu garrantzitsua zela, baina pribatua, Garamendiren ekipoak eginiko erreserba bati erantzunez, eta Euskal Etxeak "irmo gordetzen duela bere independentzia eta neutaltasuna eta gai politiko alderdikoiak atez kanpo uzteko araua", Xabier Berrueta euskal etxeko lehendakari ohiak --eta Clinton eta Garamendi eskua emanez agurtu zituenetako bat-- EuskalKultura.com-i azpimarratzen zionez.

[Basque Cultural Center-eko lehendakaria, Philippe Acheritogaray, John Garamendirekin hizketan, eskua Clintoni ematen ari zaion bitartean]

Garamendi hautagaia, bere kanpainan ardatz diren osasun zerbitzu unibertsalaren eta energia berriztagarrien gaiak ukitu zituen, besteak beste, baita Clintonek ere. Bere solasaldian, Estatu Batuetako presidente ohiak duela 34 bat urte Hillaryrekin batera egin zuen bidaia bat ekarri zuen gogora, herriz herri eta festaz festa. Esan zien bertaratutakoei ez zeukala arazorik euskaldun bihurtzeko, arraina eta esne hotzarengatik ez balitz (?).

Aretoa jendez mukurru

Clintonek azaldu zuen, Garamendiri zor diola euskaldunei buruz gaur egun daukan ezagupena. Izan ere, Garamendi Clintonen Administrazioko kide izan zen bolada batez, presidenteak Barne estatu-idazkariorde (ministro orde) izendatu zuenean. Garamendiren lanerako gaitasuna goraipatu zuen, baita bere irria ere, esan zuenez irri hori bere lagun mina baita, bederen duela 18 urte ezagutu zuenetik, gaiei behar bezala eusteko. Clintonek argiro sostengatu zuen Garamendiren kanpaina eta, mitina bukatutakoan, aireporturako bidea hartu zuen. Garamendi familiak, ostera, Euskal Etxeko jatetxean afaltzen gelditzeko erabakia hartu zuen.

Garamendiren biloba pilotazaleak

Pasadizo gisa, aipa daiteke Euskal Etxeko bazterrak --bertakoa Estatu Batuetako euskal etxerik handiena da-- ezagutzeko bisita gidatuan, Garamendiren biloba tipiak harrituta gelditu zirela pilotarekin, eta bertatik alde egiteko tenorea heldu zenean, komeria batzuk ere heldu zirela, haurrek ez baitzuten frontoitik joan nahi.

Oroit dezagun, azkenik, egun Kaliforniako gobernadoreorde den John Garamendi estatu bereko 10 zenbakidun barrutiko Kongresurako eserleku bat bereganatzekotan ari dela, Ellen Tauscher demokratak Obamaren eskaintza bat onartu eta kargua utzi ondoren. Hauteskundeak joan den irailaren 1ean izan ziren, eta Garamendi botorik gehien lortu zituena izan bazen ere, ez zuen aski boto lortu zuzenean hautatua ateratzeko. Begiak orain, beraz, azaroaren 3an gauzatuko diren hauteskundeei so daude eta hor erabakiko da geroaren nondik-norakoa.