euskalkultura.eus

Caracaseko euskal komunitateak urtero ospatzen du San Antolin eguna, Lekeitio festak eta Antzar egunaren tradizioa gogoan. Aurten ere egin zuten jaia, eta bertan ateratako argazki sorta ederra helarazi digute. Festan, Caracaseko euskaldunekin batera Valencia estatuko Caraboboko Euskal Etxetik etorritako lagun talde mardula ere izan zen.

Caracas, Venezuela. Iragan irailaren 27an egin zen San Antolin eguneko festa Caracasen, baina gure Argazki Galeria prest eduki arte zain egon gara artikulu hau argitaratzeko. Azkenik, prest dugu Caracaseko Eusko Etxeak helarazi digun argazki sortarekin osatutako galeria (ikusi, eta komentatu, behean).

Festa eguerdian hasi zen, Eusko Etxea-ko presidente Pedro Arriagak Euskalkultura.com-i adierazi dionez. Orduan heldu ziren Caracaseko elkartera Valenciako Euskal Etxetik etorritako 30 lagunak, autobusean, Arrate Coscojuela presidenta buru zutela. Giroa oso alaia izan zen eta bi euskal etxeetako kideak pilotan lehian aritu ziren. Gero, mahaira eseri eta bazkari ederraz gozatu zuten: marmitakoa eta sardina erreak.