Sakanako talde batek egin duen Boiseko Ikastolaren abestia sarean da: 'Bihotzetik mundura'

Boisetik Nafarroako Sakanara, ez da makala 'Bihotzetik mundura' abestiak orain arte egin duen bidaia! Boiseko Ikastola iazko martxoan jarri zen Hesian taldearekin harremanetan eta Idahoko bihotzean euskara ikasten ari diren neska-mutilek abestia egiteko proposamena egin zieten. Nafarrek ez zuten ezagutzen AEBetako Diaspora euskalduna, eta zur eta lur gelditu dira Ikastolak euskararen alde egiten duen lanarekin. Abestiaren bideoa sarean da jada eta taldearen hurrengo diskoan ere agertuko da.

Iruñea, Nafarroa. Joan den urtarrilean argitaratu zuten sarean 'Bihotzetik mundura' abestiaren bideoa Hesian taldekoek eta dagoeneko makina bat bisita izan ditu. Boiseko Ikastolarekin batera egin dute sakanarrek abestia: Boiseko ikastolan letra idatzi zuten eta gero nafarrek musika konposatu eta hitzak egokitu zituzten. Kolaborazioa halabeharrez gauzatu zela esan daiteke, baina nafarrak pozik agertu dira Idahoko eta AEBetako euskaldunen berri izateko aukera eman dien proiektu honekin.

"Ikastolakoek aspalditik zuten abesti bat egiteko ideia eta euskal talde baten bila ari ziren horretarako. Ikastolako langile batek taldea ezagutzen zuen, egia esan taldeko baten neskalaguna ezagutzen zuen, eta harek jarri gintuen kontatuan", azaldu dio EuskalKultura.com-i Franek, taldeko egungo kantariak.

Lehen kontaktua iazko martxoan izan zen eta sakanarrek udan idatzi zuten abestia, Boisetik bidalitako letran oinarrituta. Baina irailean taldeak abeslari berria hartu zuen eta urtarrila arte ezin izan zuten grabatu. Urtarrilean jarri zuten abestia sarean, eta orain, letrak dioen bezala, kantua mundurako bidea egiten ari da internet bidez. Hesian-en hurrengo diskoan agertuko da kantua eta taldeak zuzenekoetan abesten du jada, Boiseko ikastolaren proiektuaren berri emanez Euskal Herriko bazterretan.

"Ikaragarria da ikustea Euskal Herritik kanpo euskal kulturaren inguruan egiten den lana. Kristoren indarra ematen digu horrek", dio kantariak. Lan horren eredu da Boiseko Ikastolaren proiektua. Ikastola 1998an sortu zen, Boiseko euskal komunitateko gurasoek sustatuta, euren seme-alabei euskara lagun artean eta jolasean ikasteko aukera emateko. Sei urtetik beherako neska-mutilak ibiltzen dira ikastolan, gehienak euskal jatorridunak, baina bada euskal arbasorik ez duenik ere.

['Bihotzetik mundura' kantuaren bideoa]

"Entzuna genuen inoiz, bazegoela euskal komunitate bat Ameriketan, baina orain enteratu gara nola funtzionatzen duen benetan", aitortzen du Franek. Proiektuarekin hasi eta iazko udan Boiseko euskal mundua zertxobait gehiago ezagutzeko aukera izan zuten, bertako euskal komunitateak antolatzen duen Jaialdi elkarretaratze erraldoiaren berri Euskal Herriraino heldu baitzen. "Boiseko alkateari egin zioten elkarrizketa bat entzun nuen, eta harrituta gelditu nintzen harek egiten zuen euskara perfektuarekin! Hemengo askok horrela egingo balute...", dio kantariak.

Euskal komunitate hori zuzenean ezagutzeko gogo itzela dute orain Hesian taldeko kideek eta etorkizunean kantua Boisen aurkezteko aukera izatea espero dute.

-Boiseko Ikastolaren webgunea, hemen
-Hesian taldearen webgunea, hemen

'Bihotzetik mundura' kantuaren letra:

Artzainen ogibide
Boiseko ardiak
Euskal Herritik irten
Amets horren bila

Kultura ta hizkuntza
Beti bihotzean
Euskara lotzen dugu
Kaletik sortzean

Barruan daramagu
Arbasoen hitza
Groveko plaza honi
Emanez bizitza

Zahar bilakaturik
Garaiko gazteak
Gaur bilobak dituzte
Hizkuntzan askeak

Ekar dezagun
Denon ahotsera
Euskara degu
Gure bandera

Bere arnasa
Bilakatu gera
Boiseko herritik
Mundu zabalera

Hamarkada beteta
Indarrez ardia
Jositako haria
Urteen lanaldia

Euskaldunon bidea
Eraikitzekotan
Boiseko ikastola
Ez utzi inoiz lotan

Euskara dugu, euskaldunak gara
Barruan daukagunaren islada
Boiseko trena da gure galtzada
Bere doinua da gure taupada

Ekar dezagun
Denon ahotsera
Euskara degu
Gure bandera