euskalkultura.eus

euskal diaspora eta kultura

Albisteak rss

Rocio Basterra eta Natalia Hormazabal argentinarrek euskara maila erakutsi zuten Mihiluzen; bideoa ikusgai hemen

2008/06/23

Rocio Basterra eta Natalia Hormazabal Mihiluzen
Rocio Basterra eta Natalia Hormazabal Mihiluzen

PUBLIZITATEA

Diasporako euskara ikasle askok maila ederra lortu dute, ahalegin eta ikasketa ordu askori esker; duela bi aste Rocio Basterra eta Natalia Hormazabal argentinarrek ederki erakutsi zuten hori, ETBko Mihiluze saioan parte hartuz. Ez zuten irabazi, baina bai euskaldun zaharren ondoan ederki moldatzen direla frogatu, euskarazko joko, errima, SMS ulertezin eta jeroglifikoak deszifratuz. 'Esperientzia oso ona izan zen eta berriz errepikatuko genuke', dio Rociok. Saioa ETBn edo Calan Vascoren bidez ikusterik izan ez zutenentzat, jarraian Mihiluzek EuskalKultura.com-entzat eginiko une onenen bideo bat eskaintzan dizuegu.

Donostia-San Sebastián. Rocío Basterra (Viedma) eta Natalia Homarzabal (Buenos Aires) argentinarrek Euskal Telebistako Mihiluze saioan parte hartu zuten duela bi aste. Kike Amonarrizek eta Ilaski Serranok aurkezten duten saio honetan hiru bikote lehiatzen dira, eta joko, bertso, jeroglifiko eta beste hamaika frogen bidez euren euskara maila, imajinazioa eta abilezia erakusten duten. Frogak oso dibertigarriak eta konplikatuak izaten dira, eta sarri  euskaldun zaharrek ere gorriak eta bi ikusten dituzte erantzun zuzena asmatzeko. Euskal argentinar gazteak, baina, ederki moldatu ziren.

‘Batzuetan ez genekien zer egiten ari ginen ere, baina lantaldekoak oso jatorrak ziren eta oso eroso sentiarazi gintuzten', kontatzen du Rociok. Hala ere, telebistan egotearen nerbioak gainditu eta gero, bi neskak animatu eta lehiaketaren dinamikan sartu ziren buru belarri: 'Gero irabazi egin nahi genuen!'. Argentinan lagun askok saioak Canal Vasco bidez ikusteko aukera izan zuten, eta zorionak eman dizkiete Rocio eta Nataliari Diasporako euskaldunek ere euskeraren alde egiten ari diren lanaren erakusle izateagatik.

Lazkaoko Maizpide euskaltegian egon dira Rocio eta Natalia azken sei hilabetetan, euren euskara hobetzeko HABEren Euskara Munduan egitasmoari esker. ‘Esperientzia oso aberasgarria izan da eta gure euskara maila asko hobetu dugu’, aipatzen du Rociok. ‘Gauza berri asko landu ditugu eta orain, Argentinara bueltatzen garenean, ikasten eta klaseak ematen jarraituko dugu, hemen ikasitakoa gal ez dadin'.

Bideoak atalean Mihiluzeko programetako euskal argentinarren unerik onenen bideo bat ikus daiteke, hemen.




« aurrekoa
hurrengoa »

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia