euskalkultura.eus

Rio Cuarto, Argentina. Joan den martxoaren 31an eta Aste Santua hasi aurretik, Rio Cuartoko Gure Ametza Euskal Etxeko kideek amaiera eman zioten ekintzaz betetako hilabete bati. Zeremonia hunkigarri batean omenaldia egin zitzaion etxeko sortzaileetako eta erakundeko lehendakari ohia den Imanol Bilbaori. Bilbao Gallartan jaio zen Espainiako gerra zibila hasi baino lehen. 1952. urtean Argentinara etorri zen eta Pergamino hirian bizi ondoren Rio Cuarton kokatu zen 1956an. Hor, denboraren poderioz, hirian ospe handia erdietsitako “Bilbao” Denda ireki zuen.

[Imanol Bilbaori emandako plaka (argazkia EE)]

Garai hartan, Rio Cuarto-n ez zegoen euskal etxerik eta Imanol Bilbao beste euskaldun batzuekin elkartu zen euskal etxea sortzeko asmoz. Hasieran proiektua baizik ez zena laster burutu zen. 1994ean Gure Ametza Euskal Exea jaio zen eta lehenengo lehendakaria izatearen ohore eta ardura Bilbaorena izan ziren. Martxoaren 31an egindako omenaldian, gaur egungo batzordeak beste kide sortzaileekin batera omenezko plaka bat eskuratu zioten Bilbaori.

[Batzordeko kideak eta etxeko sortzaileak Bilbaori egindako omenaldian (argazkia EE)]

Zinema zikloa eta argazki erakusketa

Bestalde, euskal etxeko gazteek zine zikloa antolatu zuten politikaz eta martxoan zehar gerra zibil eta Euskal Herriko Rock-aren historiari buruzko dokumentalak bota zituzten Gure Ametzako egoitzan. Hauetaz gain, Julio Medemen “La pelota Vasca” pelikula proiektatu zen. Euskal Etxera bertaratu zen jendeak euskal baserrien eta musika tresnen erakusketaren argazkiak ere ikusi ahal izan zituen. 'Horrelako ekintzak egiten ditugun lehenengo aldia da hau guretzat eta oso kontent gaude arrakasta handia izan dugulako. 150 lagun etorri ziren filmak eta erakusketa ikustera eta interes handia erakutsi zuten', adierazi diote EuskalKultura.com-i euskal etxeko kideek atseginez beteta.

[Martxoan zehar zine zikloa garatu zen Gure Ametza Euskal Etxean (argazkia EE)]