Kanpaina hasi du Sü Azia elkarteak Robert Laxalten 'Sweet promised land' protagonistaren xibereraz kaleratzeko

2010/11/19

AEBetako hainbat literatura adituk Laxalt 'Nevadako Ernest Hemingway' bezala deskribatu izan dute, bere estilo soil baina energiaz beteagatik. Orain zubereraz ere irakurri ahal izango da

PUBLIZITATEA

Harribitxia da euskarazko argitalpenen munduan, eta Gabonetan egiteko opari ederra zein xiberotar euskalkia eta kultura sustatzeko aukera bikaina izan daiteke. Baina ez hori bakarrik. Robert Laxalt euskalamerikarraren eleberria Ameriketara artzain joandako euskaldun baten bizipenen kontaketa zirraragarria da, amerikartze prozesuarena eta irakurleari Oesteko natura basati eta librearen emozioa sentiarazten diona. Xiberoko Sü Azia elkartea ahalegin berezia egiten ari da orain xiberotarrez, xibereraz argitaratzen. Kultur taldeak irakurleen laguntza eskatzen du eta liburua aldez aurretik erosita merkeago eskuratzeko aukera eskaintzen du. Hona Baionako Herria aldizkariak horren inguruan plazaratu deia, zuberera edo xiberotarrez idatzirik.

Maule, Xiberoa. Xiberoko eüskara süstatü nahi düan Sü Azia alkarteak agerraraziko dü hebentik laster 'Aita artzain zen' izenbürüko libürü bat. Hau date Robert Laxalt kasetalariak 1957. urtean argitaratü züan Sweet promised land izeneko libürü baten xiberotarrezko ützülpena. Hontan, Robert Laxaltek kontatzen züan zer izan zen Ameriketatako Estatü Batuetara desterritü zen haren aita Dominique Laxalten bizia. Libürü hau hanitx ezagütürik da 'Mon père était berger' frantsesezko ützülpenarengatik, hau bigerren aldi batez agertü delarik 2009. urtean.

Dominique Laxalt, Liginaga-Astüeko Galantenea etxaltean sortü bazen ere, orai artino ihork ez züan egin xiberotarrezko ützülpenik eta hortara plantatü da Jean-Pierre Etchebarne mauletarra. Xiberotarrez idatzirik denik ez da hainbestekorik eta, arren, Sü Aziari hon üdüritü zaio libürü horren agerraraztea. Su Aziarentako egingei horrek badü kostü bat; xüxen erraiteko, 700 euro, 200 libürüren irartzeko (inprimatzeko), gehi 300 euro argitaratatze baimenaren biltzeko.

Abendua aurretik erosiz gero merkeago

Abentü honen ürrentzeala artino abantzeala erosi nahi izanen düenentako 200 hoillatako libüru hau 15 eurotan date (+ 5 euro postaz helarazteko fresentako). Hortik aitzina, 20 eurotan salgei date (+ 5 euro postaz helarazteko fresentako). Arren, xiberotarrez izkiribatürik den argitalpen baten lagüntzea gogoan izanen düzülakoan, libürü horren abantzeala erostea proposatzera horra gitzaüzü.

'Aita artzain zen' libürüa bildü nahi badüzü, jakinaraz izagüzü abentüaren 31ª artino 15 euroko xeka bat igortez (gehi, halabeharrez, 5 euro posta fresentako) helbide hontara: Sü Azia – Hondarearen Etxea – Jean-Baptiste Heugas karrika, 10 – 64130 Maule-Lextarre. Postaz igorte fresik ez ükeiteko, Sü Aziaren egongian – Hondarearen Etxearen gaineko partean – igaraiten ahal zirate ere. Xehartarzün haboro nahi bazünüe mezü bat helarazi izagüzü suazia@free.fr posta elektronikoala edo deit 05.59.28.05.67 telefona zonbakiala.

Oraidanik, eskerrik hanitx gure eskentza honi eginen deiozün batzarriaz.

-Sü Azia alkartean webgunea, heben.