euskalkultura.eus

Paris, Frantzia. Pariseko Eskual Etxea gazteagoa bada ere, egun elkarte hau osatzen duten talde euskaltzaleek makina bat urte daramate Frantziako hiriburuan euskal kulturaren alde lanean. Gauzak horrela, iragan urtarrilean euskal etxeko bazkide eta lagunak pozik bildu ziren elkarte horien urteurren jaiaz gozatzera. Giroa ezinhobea izan zen, Elgar aldizkariak adierazi duenaren baitan, eta musika, dantza, umore ona eta ondo pasatzeko gogoa izan ziren nagusi.

Urteurrena betetzen zutenen artean, azpimarragarria da Eskualdunak elkartearena: ehun urte! Munduan zehar, gutxi dira halako marka lortu duten euskal etxe eta elkarteak. Gernika koruarena eta Elgar aldizkaria ere ez da makala: 80 urte. Orobat, Sustraiak-Erroak euskara taldeak 30. urtemuga ospatu zuen eta Anaiki koruak 25. urteurrena.

Jaia Elgar aldizkariari buruzko hitzaldi batek abiatu zuen. Aldizkaria 1932an sortu zuen Paul Legarraldek eta egun Sebastian Daguerre da zuzendaria, Maryse Lartigue erredakzioburu duela. Hitzaldian, buletinetik igaro diren hainbat lagunek parte hartu zuten. Beste ekitaldi azpimarragarri bat Anaiki eta Gernika abesbatzek eta Sustraiak-Erroak taldeko ikasleek eskaini zuten ikuskizuna izan zen. Festako afarian Pierre Oteiza enpresako gutiziak dastatu ahal izan zituzten bertaratu zirenek eta, afalondoan, Gasteizko Akelarre taldeak kontzertua eskaini zuen. 

Zuzendaritza berria

Bestela, aipatu urtarrilaren 27an hauteskundeak egin zirela elkarteko zuzendaritza berritzeko. Honako bazkide hauek izan ziren hautatuak, Idoia Caserta buru, bi urteko agintaldirako: Idoia Caserta, Elisabeth Caserta, Corinne Bordalecou, Isabelle Garay, Jean Tillous, Beatrice Gette, Christophe Maurou, Marie-Christine Baptiste, Serge Haure, Florence Teixeira, Daniel Casado, Rowena Larrette, Dephine Gonzales, Marie Joyeux, Maria Vieira eta Josephine Trinquet.