euskalkultura.eus

Asuncion, Paraguai. Hiriburu paraguaiarreko euskal etxetik ohar baten bidez adierazi zaigunez, Jasone Euskal Etxeak deia luzatu die kide dituen gizon-emakumeei datorren ostiralean, apirilaren 27an, bere egoitzan garatuko duen Urteko Biltzar Nagusira bertara daitezen, hitzordua, lehenengo deialdian arratsaldeko zazpietarako finkatu duelarik eta bigarrenean, zazpi t'erdietarako, beti ere Juan Manuel Frutos Pane 268-ko helbidean, Rio de Janeiro eta Jose Berges artean.

Ohi denez, Biltzarrean aztertuko diren gaietako batzuk egungo Zuzendaritza Batzorde eta buruzagien azken Biltzarretik honantzako kudeaketa eta epe bereko kontu ekonomiko zein bestelakoak izango dira eta horrekin batera datorren agintarialdirako kargu berriak hautatzea, lehendakariarena ere barne. Saia, elkartearen aldeko topa egite batekin bukatuko da.

Lore eskaintza eta hitzaldia Gernikaz

Egun bat lehenago, apirilaren 26an, nazi eta faxista italiarrek Francoren sostenguarekin Gernika bonbardatu zutela 75 urte beteko direnez, Asunciongo Euskal Etxeak ekitaldi berezi batzuk egingo ditu hiriburu paraguaiarrean Euskal Herriko euskaldunekin eta munduko gainerako euskal etxe eta gizataldekoekin bat eginez gertakari hura gogoan. Kari horretara, lore eskaintza bat egingo da hiriko Gernikako Arbolaren monumentuaren aurrean.

Aukera baliatuz, bildutakoei Daniel Elicetche doktorea zuzenduko zaie, arratsaldeko bostetan hau guztia, egunari dagozkion hitzak jendaurretuz. Ondoren, zazpietan eta Club Union delakoan (Palma kalea 751 ia Ayolas) "Bombardeo de Gernika" (Gernikako bondardatzea) izeneko hitzaldia eskainiko du Pedro Gamarra Doldan doktoreak.