Oxford Unibertsitateko Forum of Iberian Studies-en parte hartzeko lanak bidaltzeko epea irekita

2014/01/22

Oxfordeko Unibertsitatea Europako nagusienetakoa da

PUBLIZITATEA

Oxfordeko Unibertsitateak Iberiar ikasketen 16. edizioa beteko du datorren martxoan eta bigarrengoz euskarak leku berezia izango du bertan, Etxepare Euskal Institutuaren laguntzari esker. Antolakuntzak gonbitea luzatu die txostena aurkeztu nahi duten hizkuntzalari eta adituei, euren proposamenak bidal ditzaten hil honetako 31 baino lehen. Aurtengo gaia “Kultur eta hizkuntz aniztasuna Iberiar Penintsulan" izango da.

Oxford, Ingalaterra. Oxford Unibertsitate ospetsuak martxoaren 19tik 21era baitaratuko du XVIth Forum of Iberian Studies topaketa. Aurtengo bilkuraren gai nagusia “Kultur eta hizkuntz aniztasuna Iberiar Penintsulan" izango da eta euskara, katalana, galegoa eta gaztelania izango dira hizpide. Nazioarteko hizkuntzalari eta adituak hizkuntza hauen egungo egoerari, elkarbizitzari eta beste zenbait alorrei buruz mintzatuko dira.

Unibertsitateak bertan parte hartu nahi duten ikerlariei euren proposamenak bidaltzeko gonbitea luzatu die, horretarako epea urtarrilaren 31 arte irekita dagoela adieraziz. Txosten proposamenak bideratzeko, 200-250 hitz inguruko laburpen bat bidali beharra dago fis@mod-langs.ox.ac.uk helbide elektronikora. Etxepare Euskal Institutuak euskarari buruzko gaien aurkezpena lagunduko du.

-Mintegiari eta txosten proposamenak bidaltzeko erari buruzko informazio gehiago Forum for Iberian Studies webgunean