'Ongi Etorri' euskal etxearen eskutik, euskal dantzak eta zinea San Pedroko Gizataldeen XIX. Jaian

2011/10/06

2010eko San Pedroko Gizataldeen Jaian bertoko euskaldunek muntatutako standa (argazkia EE)

PUBLIZITATEA

Asteburu luzea da datorrena Argentinan zehar eta azken urte hauetako ohiturari jarraituz Gizataldeen Jaia ospatuko da San Pedro hirian. Hiru egunetako jaialdi honetan sanpedrotarrek ez ezik, hara hurbiltzen diren turistek ere herri askotako adierazpen kulturalez gozatzeko aukera izango dute. Bertoko euskaldunek aurreko edizioetan bezala, partaidetza nabaria izango dute festan. Euskal dantza ikuskizuna eskainiko da agertoki nagusian, laburmetraiak ikusi ahal izango dira ekintza kulturalen unean eta plater tipikoak dastatu ahal izango dira 'Ongi Etorri' Euskal Etxearen standean.

San Pedro, Argentina. Urriaren 8tik 10era ospatuko da Buenos Aires probintziako San Pedron XIX. Gizataldeen Jaia. Testu-inguru honetan herriko eskulan, merkataritza eta industriaren 3. erakustaldia ere gauzatuko da Parana ibaiko kostaldean dagoen hirian.

Udaletxea eta Gizataldeen batzordea antolatzaile, XIX. Gizataldeen Jaiak jatorri ezberdinetako kulturak bilduko ditu, tartean, kolektibitate arabiarra, paraguaitarra, errusiarra, alemaniarra, mallorcarra eta euskalduna, batzuk aipatzearren. Talde bakoitzak bere musika, dantzak, kirolak, hizkuntza, sukaldaritza, antzerkia eta jantziak partekatuko ditu publikoarekin ekintza ugariz baliatuta. Jaiaren markoan maratoi batean eta Kolektibitateen Erreginaren hautaketan hartuko dute parte bisitariek.

Eta euskaldunek ere izango dituzte euren ordezkariak San Pedroko jaian. Izan ere, 'Ongi Etorri' Euskal Etxeak gonbidaturik, urriaren 9an, hau da, igande honetan, gaueko 8:55etan Ekin Dantzari Taldea aurkeztuko da jaiaren tauletan. Ekintza kulturalen une edo karpan, berriz, Kimuak bildumako laburmetraiak botako dira urriaren 8an – larunbatean – arratsaldeko 5:30etan eta igandeko 6:00etan. Euskal zapore eta usain gozoenak ere aurkitu ahal izango dira San Pedroko Gizataldeen XIX. Jaian. 'Ongi Etorri' Euskal Etxearen standean plater eta mokadu tipikoak eskainiko dituzte euren standean.

Hitzordua larunbat goizeko 11etan hasiko da, San Pedroko Paseo Publico-n, eta sarrera, dohain eta librea.