euskalkultura.eus

Olavarria, Argentina. Milaka lagun bildu ziren otsailaren 21an Olavarriako “Corsodromoan” inauteriei amaiera emateko. Lau kaleko kabalkadak txalo ugari jaso zituen eta karrozen eta konpartsen ilara pasatu eta gero, Momo Erregearen panpinaren erretzea eta su artifizialen ikuskizuna ikusi ahal izan zuen publikoak. Festako ekimenen artean, karroza onenak hautatu ziren eta Gure Etxe Maitea euskal etxeak prestatutakoak bigarren saria jaso zuen. Karrozak euskal baserri baten itxura zuen eta karrozan zihoazenak Euskal Herriko ohiko jantziz jantzita joan ziren. 

[Olavarriako euskal etxeko txikienak, baserri itxurako karrozan (argazkia Infoeme Diario On Line de Olavarria)]

Aberri Eguna, irratia eta ikastaroak

Datozen hilabeteei begira, ekintza-sorta iragarri dute euskal etxeko arduradunek. Hasteko, apirilaren 15ean --eta Argentinako beste hainbat euskal erakundek egingo duten legez-- Aberri Eguna ospatuko du Olavarriako Gure Etxe Maiteak. Bazkaria etxeko egoitzan izango da honako menuaz: mota askotako pintxoak, arkumea txilindron erara, postrea eta edariak. Txartelak 100 peso balio ditu eta salgai jarriko diren sarreren kopurua mugatua denez, antolatzaileek gomendatzen dute aldez aurretik eskuratzea Moreno kaleko 3078 edo 2910 zenbakietan. Telefonoz ere egin daitezke erreserbak, 02284 15454232 edo 02284 15623935 zenbakietara.

Komunitateari zuzendutako beste proposamenik ere badu 2010ean ateak berriro ireki zituen euskal etxe honek. Larunbatero goizeko 8etatik 9etara “Euskaldunen Ordua” delako irratsaioa aireratuko da FM 97.1 frekuentzian. Ordubeteko emanaldian, Euskal Herriarekin lotura dituzten hainbat gai garatuko dira.

Euskara eta euskal dantzak ikasi nahi dituztenentzat, ikastaroak laster hasiko dira Olavarriako euskal etxean. Dantzarien taldeak adinaren arabera osatuko dira. Erantzuleek adierazi digute eskolak doakoak izango direla. Informazio gehiago eskuratzeko, euskal etxeko egoitzara (Irigoyen eta Alsina) jo daiteke, larunbatetan arratsaldeko 3etatik 5etara. Telefono zenbakiak, berriz, 02284 15454232 edo 02284 15623935 dira.