NYen euskal jatetxe edo 'euskal etxe berezi bat' bideratzeko lanetan ari da Bizkaiko Foru Aldundia

2010/01/25

Aurretik ekitaldi solteak antolatu izan dira New Yorken eta Miamin, esaterako, Bilboko eta Bizkaiko gastronomia azpimarratzearren. Argazkian 2006an New Yorkeko Nazio Batuetan antolatutako saio gastronomikoa

PUBLIZITATEA

Bizkaiko Foru Aldundia lanean legoke New Yorken Bizkaiko sukaldaritzaren eta oro har Bizkaiko aberastasun turistiko, gastronomiko eta naturalen erakusgarri izan daitekeen euskal jatetxe edo zentro bat zabaltzeko asmoaren inguruan. Halaxe zioen atzokoan Deia egunkariak, Bizkaiko Foru Aldundiko Turismo departamentuko iturriak aipatuz, AEBetako tour-operadore, sukaldari eta gastronomi kritikari talde batekin hil honen 16tik eta gaur arte Bizkaian zehar egiten aritu diren bidaiaren amaieran. Kalitatezko euskal jatetxe bat, sinergiak baliatzearren nolabaiteko loturarekin Euskal Etxearekin, New Yorkeko euskal komunitatean aspalditik elikatu izan den ametsa da. Artikuluak ez du Eusko Etxea aipatzen, baina bai euskal jatetxe hori irekitzeko orain zabaltzen ari den posibilitatea.

Bilbo, Bizkaia. Bizkaiko Foru Aldundiko Turismo departamentuak gonbidaturik Estatu Batuetako turismo eta gastronomia alorreko ordezkaritza bat ibili da azken hamar egunetan Bizkaian, bertako lurraldea, paisaiak, gastronomia eta turismo baliabideak ezagutzen. Ekimenaren helburua, New Yorken proiektu gastronomiko bat zabaltzea aztertzea litzateke, "euskal etxe berezi bat", hiriko euskaldunen biltoki izan eta, aldi berean, Euskal Herriaren erakusgarri funtzioa beteko lukeena.

Ideia hori airean ibili omen da egunotan ordezkaritza estatubatuarrak Bizkaira egin duen bidaian: delako jatetxea, Estatu Batuetara doazen euskaldunen biltoki gisa ikusten dute eta, bestetik, Bizkaiko turismo eta gastronomiaren erakusgarri, bertatik sukaldaritza eta bestelako sustapen eta ezagutarazte jardunaldiak antolatuz, Aitor Elizegi edo Aitor Basabe bezalako bizkaitar sukaldari ospetsuen eskutik.

Bizkaiko eta Euskal Herriko presentzia turistikoa Estatu Batuetan sartzeko ahalegin hauek bi urte-edo egiten omen dute atzera, besteak beste Miamin, Gabino Martinez de Arenaza Bizkaiko Foru Aldundiko Turismo zuzendariak esanik. Orain, AEBetako ordezkaritza honek Bizkaia bisitatu duelarik, negoziazio epe berri bat irekiko litzateke New Yorken ezaugarri horiek izango lituzkeen euskal jatetxe bat zabaltzeko. AEBetako ordezkaritzako kideetakoa da Terry Zarikian gastronomi kritikaria eta euskal sukaldaritza zale amorratua: "Euskal sukaldaritza munduko onena da", haren esanetan.

-Deiako artikulua, hemen