euskalkultura.eus

Necochea, Argentina. Anitz dira Euskal Herria eta Argentinaren arteko harremanak sendotzeko proiektuak, baina  Necocheako Euzko Etxeak sortutako 'Hator Hona' proposamena berezia da oso. Batetik, Euskal Herriko gazteei zuzenduta dago –18 eta 30 urte bitartekoei– eta gazteek berek ordaintzen dituzte Argentinara bidaiatzeko gastuak. Alabaina, Necocheara heltzean, bertako familiak jasotzen dituzte neska eta mutilak euren etxeetan eta programaren argentinar aldea arduratzen dira mantenuaz.

Aurtengo edizioan, Euskal Herriko zazpi gaztek hartuko dute parte. Trikitixa eta panderoa jotzen irakatsiko dutenak June Egileor Garai, Amaia Miguel Quintana eta Karine Etcheverry dira. Dantzak, berriz, Aizkoa Medenabeitia Vegas eta Garikoitz Nuñez Aldalur-en esku egongo dira. Kirol tailerrak Jon Alustiza Gorriak emango ditu eta euskaraz mintzatu edo euskal hizkuntzaren ezagutzan sakondu nahi duenak Enara Bellozo Bermudez-ekin egin ahal izango du.

Euzko Etxea-ko kidea den Kiti Zubillagak EuskalKultura.com-i komentatu dionez, "Gure neguko oporretan zehar gauzatuko dira tailerrak eta komunitate osoari irekiak izango dira, hau da, euskaldunak eta euskaldunak ez direnek beren izenak eman ditzakete ekitaldietan parte hartzeko". "Azpimarratzekoa da –jarraitzen du Zubillagak– aktibitate guztiak doan izango direla".