euskalkultura.eus

euskal diaspora eta kultura

Albisteak rss

Nafarroako Parlamentuko buru Ainhoa Aznarez-ek Valentziako Laurak Bat bisitatu zuen

2017/02/03

Ainhoa Aznarez Valentziako Laurak Bat-eko presidente Alberto Artiedarekin opari truke
Ainhoa Aznarez Valentziako Laurak Bat-eko presidente Alberto Artiedarekin opari truke

PUBLIZITATEA

Bisita joan den urtarrilaren 13an suertatu zen, estatuko legebiltzarretako buruek bilera egin zutela-eta Valentzian. Valentziako Laurak Bat inguruko euskal etxerik zaharrena da eta ia 70 urte dauzka. Elkarteak bere burua Nafarroako Gobernuaren zein Eusko Jaurlaritzaren aurrean dauka erregistratuta eta euskal etxea zein centro vasco-navarro deiturak erabiltzen ditu. 50 bat familia dauzka bazkide eta Alberto Artieda etxarriarra da elkarteko gaurregungo buru.

Valentzia hiria. Nafarroako Parlamentuak berak ohar baten bidez jakinarazi duenez, hogei bat bazkidek eman zioten harrera Ainhoa Aznarez nafar parlamentuburuari elkartearen egoitzara hurildu zenean. Aznarezek harrera eskertu eta indarra transmititu nahi izan zien, "lanean segi dezazuen gure herriarekiko eta kulturarekiko loturei eusten".

Bertako presidenteak, Alberto Artieda Jaca etxarriarrak, bisita eskertu eta esker oneko hitzak izan zituen nafar legebiltzaburuarentzat ganberan daramaten irekiera eta eredu-aldaketagatik, "Nafarroa eraikitzeko beste ikuspuntu bat sustatzeagatik", esan zuen, Parlamentuko iturriek adierazi dutenez.

Ainhoa Aznarezek ere, bere hitzetan, liferenteen artean elkar ulertzearen garrantzia azpimarratu zuen, "horrek garai aldaketa ekarri baitu, elkarrekin hitz egitearen emaitza legez", azaldu zuen.

Bertaratu zirenen artean, elkartea duela ia 70 urte sortu zuten aitzindarietako bat ere aipa daiteke, Mari Paz Irigoyen Irungaray baztandarra. Esan zuenez, elkartea peña moduan abiatu zen 1948an eta berehala, 1950ean, elkarte izatera pasatuko zen.

Urte hauetan zehar Euskal Autonomi Erkidegoko zein Nafarroako buruzagien bisita jaso izan dutela kontatu zuen.

Laurak Bateko idazkari Mikel Etxeberria Navarro donostiarra, bere aldetik, pozik agertu zen azken urteotan Nafarroko eta EAEko kultura Valentzian berriz ere iratzartzen ari den interesagatik. "Aurten hamalau bazkide berri inguratu zaizkigu, euskara eskolak ematen ditugu, mus txapelketak antolatzen... eta berehala, apirilean, esaterako, Korrika ere ospatuko dugu, dantzari eta aizkolariekin...", komentatu zuen.

Etxeberriak nabarmendu zuen elkarteak bilgune eta batzarleku gisa betetzen duen funtzio garrantzitsua, "guztiok sentiarazten baikaitu pixkat han bezala", baitetsi zuen.



« aurrekoa
hurrengoa »

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia