euskalkultura.eus

Jose Ramon Urtasun iruindarraren “Nafarroa 1936” erakusketa ikusgai dago apiril osoan Habanako Unibertsitatean. Goi ikastetxe horretan Euskara eta Euskal Kultura irakurle den Joseba Sarrionandiaren ekimenez gauzatua, errepresio frankista islatzen duten piezek osatzen dute eta Arte eta Letren fakultatean eta Iraultzaren Plazako Galerian ere ikusi ahal izango da. Irekiera ekitaldiak berrehun bat jende bildu zituen, Euskal Herriko zein Kubako.

Habana, Kuba. Etxepare Euskal Institutuak ohar batean zabaldu duenez, Habanako Euskara eta Euskal Kultura irakurletzak antolatuta, Jose Ramon Urtasun iruindarraren “Nafarroa 1936” erakusketa ikusgai egongo da bertako unibertsitatean apirilaren 3tik 31ra. Erakusketa, Habanako irakurle Joseba Sarrionandiaren ekimenez gauzatu da eta Arte eta Letren fakultatean eta Iraultzaren Plazako Galerian ere ikusi ahal izango da.

Bilduma Nafarroako errepresio frankista islatzen duten 36 lanek osatzen dute. Irudi guztiek gertakari historikoak erakusten dituzte, eta lan esanguratsua egiten dute memoria historikoaren berreskuratze eta zabaltzearen alde. Ikusmin handia sortu du Kuban, izan ere gertakari horiek garrantzi berezia dute herrialdera ihes egindako euskaldunen oinordekoentzat.

Irekieran berrehun pertsona inguruk hartu zuten parte, Euskal Herritik etorriak zein Kubatarrak. Beatriz Lafitaren “El arte y la guerra” (Artea eta gerra) sarreraren ondoren, erakusketaren egileak berak “Pintura y memoria histórica” (Pintura eta memoria historikoa) hitzaldia eskaini zuen.

Maiatzean hiri bereko La Casa de la Bombilla lokalean egongo da ikusgai erakusketa, adierazi du Etxeparek.