euskalkultura.eus

Ostiralean Bilboko Arriaga Antzokiak Klasikoen Irakurraldi berri bat hartuko du eta urtero legez makina bat euskal etxek parte hartuko dute ekitaldian, aldez aurretik grabatutako bideoen bitartez. Aurtengo protagonista Joseba Sarrionandiaren "Narrazio Guztiak" liburua izango da eta antolatzaileek agertu dutenez, idazlea berak bideo baten bidez hasiera emango dio irakurketari.

Bilbo, Bizkaia. Joseba Sarrionandiaren  “Narrazio Guztiak” irakurriko dut Arriaga Antzokian ostiralean, oso-osorik, jendaurrean, “Klasikoen VIII. Irakurraldia"-n. Bilbo Zaharra Euskaltegiak antolatu du ekitaldia, Bilboko Udaleko Euskara Sailaren eta Laboral Kutxaren babesarekin.

Irakurraldiarekin Euskara Ikasleen Jaia ospatzen da, urtean zehar euskaltegietan eta euskal etxeetan euskara ikasten debiltzanek lana aintzat hartuz. Urtero legez, euskal etxeek ere bat egingo dute festarekin eta aurten 28 elkartek parte hartuko dute, aldez aurretik grabatutako bideoei esker.

Irakurraldia goizeko 8:00etan hasi eta arratsaldeko 20:00etan bukatuko da. Bertan izango da Joseba Sarrionandia idazlea, bideo baten bidez, eta berak ekingo dio irakurraldiari.

Orotaram egunean zehar 400 lagun inguru pasatuko dira Arraigako taulagainetik. Besteak beste, hauexek izango dira partaideak: Ibon Areso Bilboko alkatea, Bilboko udaleko ordezkaria; Bizkaiko Foru Aldundiko eta Eusko Jaurlaritzako ordezkari instituzionalak; Laboral Kutxako zuzendari nagusia; Euskal Herriko Unibertsitateko eta Deustuko Unibertsitateko errektoreak eta irakasleak; Andres Urrutia, Euskaltzaindiako presidentea.

Aipatutakoez gain, Bilboko Udalbatzako kideek irakurriko dute; baita euskaltzainek, hedabideetako ordezkariek, sindikalistek, Bilbo Zaharra Euskaltegiko eta Bilboko ikastetxeetako ikasle eta irakasleek, ostalariek, Gotzaingoaren ordezkariek,  eta ekonomista, abokatu eta ingeniarien eskola profesionaletako ordezkariek ere.

25. urteurrena

Ekainean 25 urte beteko dira >Sarrionandiak "Narrazio guztiak" idazten bukatu zuela. Euskal narrazioaren alorrean, narratiba moderno bat ekarri zuen Lan honek.  80ko hamarkadan hiru ipuin-bilduma kaleratu zituen iurretarrak: Narrazioak, Atabala eta euria (1985) eta Ipar aldeko orduak (1990). Horiez gain, aurretik idatzitako hiru istorio, orain arte haren liburuetan inoiz sartu gabekoak. Guztiak berridatzi ditu egileak, zuzenketa axalekotik harago, estiloa goitik behera aldatuz baina bere jatorrizko espirituari leial eutsiz. Emaitza, klasikoa bezain gaurkoa, irakurle gazteak nahiz antzinakoak liluratzeko modukoa.

Aurreko urteotan, Axularren Gero, Mogelen Peru Abarca, Miranderen Haur Besoetakoa, Saizarbitoriaren Hamaika Pauso, Urretabizkaiaren Zergatik Panpox, Bernardo Atxagaren Obabakoak eta Gabriel Arestiren Harri eta Herri irakurri zituzten.

Aurten, hirugarrenez, Bilboko Alhondigako sarrerako pantailetan ere zuzenean ikusi ahal izango da irakurraldia egun osoan zehar. Horretaz gain, irakurketa streaming bidez 12 orduan zehar jarraitu ahal izango da Eitb-ren webgunean: http://www.eitb.eus/narrazioguztiak-irakurketa

Hauek dira irakurraldian parte hartuko duten euskal etxeak: