euskalkultura.eus

Zenbatetan nahi izan diozu norbaiti galdetu hitz bat euskaraz nola esan, baina ez zenuen inor eskura? Edo euskal hitz batek zer esan nahi duen jakin? Orain, zure sakelekoak emango dizu erantzuna, Mitzuli aplikazio berriari esker. IXA taldeko Mikel Artetxe garatzaileak sortu du Android smartphonentzako, eta doakoa da.

Donostia-San Sebastián. Mitzuli aplikazioa 50 hizkuntzen arteko itzulpenak mugikorrarekin, era erraz eta azkarrean egiteko aukera ematen du. Aplikazioa doakoa da, Android sistemako mugikorrentzako sortua da eta Google Play dendan dago eskuragarri.

Itzulpenak hiru eratara egin daitezke: 

1.- Testua idatzi pantailan eta itzulpen hizkuntza aukeratu.

2.-Ahotsarekin: itzuli nahi duzun hitza edo esaldia esan, aukeratu itzulpen hizkuntza, eta kitto!

3.- Argazki batekin: adibidez, kartel bat edo menu bat itzuli nahi baduzu, ateraiozu argazkia eta aukeratu itzulpen hizkuntza. Sistemak testua irakurri eta itzuli egingo du.

Horrez gain, aplikazioak beste funtzio bat ere badu: hitz bat hizkuntza jakin batean nola esaten den ez badakizu, aplikazioan idatzi eta telefonoak ahoskatuko dizu.

Mitzulik afrikaansa, aragoiera, asturiera, daniera, errumaniera, esperantoa, euskara, frantsesa, galiziera, gaztelania, hindia, indonesiera, ingelesa, italiera, katalana, kroaziera, malaysiera, nederlandera, okzitaniera, portugesa, suediera eta urduarekin egiten du lan, besteak beste.