Posadas, Argentina. Posadas hiriko Euskal Etxeak jakinarazi nahi dio euskal komunitateari bertan behera utzi behar izan duela egoitza propioa eraikitzeko proiektua. Elkarteak azaldu duenez, aurtengo maiatzean "EBY-Entidad Binacional Yacyreta" erakundearegandik komodato moduan jasotako lur eremua, eta legez derrigorrezkoak diren izapide guztiak bete ondoren, bueltatu behar izan diote erakunde emaileari, “azalpenik eskaintzen ez zuen eta eremua bueltatzera behartzen gintuen gutun bat jaso ondoren”.
“Ez dakigu zer nolako interes edota arrazoiak dauden egoera honen atzean. Duela zazpi hilabete utzi ziguten lur-eremua Euskal Etxearen egoitza eraikitzeko, eta orain, atzera bueltatze honekin diru asko ez ezik, etxea izateko genituen planak ere zapuzten zaizkigu”, adierazi du euskal erakundeak plazaratu eta zabaltzeko eskatu digun oharrean.
“Fede gaiztoaren albokoa den jokabide hau oztopatzaile da euskal kultura mantendu eta zabaltzeko lan handia egiten ari diren gure ehundik gora familientzat eta Euskal Etxearentzat berarentzat, pixkanaka pixkanaka hilabetez hilabete eta ahalegin handiz daramagun bidean”, nabarmendu dute Euskal Jatorri Euskal Etxeko lagunek. Euskal Etxeak zabaldutako gutun osoa, hemen.
Lagun bati bidali
Komentarioa gehitu
