euskalkultura.eus

Buenos Aires, Argentina. Joan den asteazkenean, apirilaren 21ean, ekin zitzaion euskal kultura gaiei buruzko aurtengo hitzaldi sortari Buenos Airesko Iparraldeko Euskal Etxearen Moreno kaleko egoitzan, izan ere Mikel Ezkerrok "Iparraldeko Euskal Etxearen sorrera, aurrekariak" gaiari buruz eman zuen hitzaldiarekin, elkartearen 115. urteurreneko programaren barne.

Jende multzo polita bildu zen erakundeko Kultura Aretoan gauzatu zen ekimenera, tartean Enrique Aramburu lizentziatua, bazkide eta lagunak, eta baita Etxea sortu zutenen bilobaren bat ere.

Hizlaria XIX. mende hondarreko euskal gizarteaz mintzatzen hasi zen, Iparraldeak orduan bizi zuen egoera aipatuz, eta euskal eskualdeak neurri handi batean hustu zituen emigrazioaren testuingurua eta zergatik aipatuz; nola eman zen emigrazio hori, nola argentinaratu eta hona etorririk zer nolako lanetan ibili ziren euskaldunak, gogora ekarriz baita ere arrakasta lortu zuten euskaldun horietako batzuren izenak, hala nola Pedro Luro, Martin Errecaborde edo Iparraldeko Euskal Etxeko sortzaileetakoa eta lehenengo presidentea izan zen Jean Pierre Passicot.

Hasierako urte gogorrez mintzatu zen, eta erakundearen sendotzeaz. Gaur eguneraino iritsi zen eta hor hitz laudagarriak izan zituen elkartearen egungo Kultura Azpibatzordearekiko, balio handia emanez eta aitortuz euskal kultura berreskuratzen eta sustatzen garatzen duen etengabeko lana, euskal etxea sortu zutenen maitasun berarekin euskal kultura eta Euskal Herriarengan, esan zuen.