euskalkultura.eus

Auckland, Zeelanda Berria. Gaurtik datorren igandera arte, abuztuak 2, garatuko da 'Food Show' sukaldaritza erakustaldia Auckland-en, herrialdeko hiriburua izan gabe bertako hiririk garrantzitsuena eta populatuena den honetan. Zeelanda Berriko sukaldariez gain, Asia eta munduko beste zenbait tokietatik iritsitako profesionalek parte hartuko dute sukaldaritza elkarretaratzean. Aurten hamargarren urtea ospatzen duen erakustaldiak Mikel Arriet Arruiz, duela bost urtedanik Filipinetan finkatua den chef andoaindarra izango du euskal ordezkari. Topaketak, sukaldeko maisuen lanen eginpideei buruzko azalpenak entzuteko aukera emateaz gain, platerok prestatzeko beharrezkoak diren lehen gai eta gastronomia produktuen azoka modukoa eskainiko du, ardoek ere euren protagonismoa partea hartuko dutelarik bertaratutako profesional eta zaletuen artean. 

Mikel Arriet-ek 2004tik Filipinetako Davao hiriko Club Punta Fuego jatetxeko sukaldea gidatzen du. Bere ibilbide profesionalean Ibiza, Tenerife eta Bartzelonako jatetxe garrantzitsuetan ibilia da, besteak beste Donostian Martin Berasategirekin aritu eta ikasitako Arriet. Bere sukaldean euskal gastronomia molde aberastuak ditu oinarri, Filipinetako sukaldaritza tradizionala ere lantzen duelarik, Mediterraneoaldeko produktuak ere erabiliz. Aucklanden igandea bitartean arituko da bere sukalde moldeak erakusten.

Arrieten partaidetza Auckland-en ez da erakustaldian amaituko, atzodanik eta igandera arte Soul Bar & Bistro jatetxean afariak prestatuko baititu. Berak sukaldatutako gutixiak dastatzeko aurrez hartu beharko da lekua.

-Informazio gehiago 'Food Show'-en webgunean: www.foodshow.co.nz