euskalkultura.eus

Iruñea-Pamplona. EuskalKultura.com-ek jakin ahal izan duenez, Nafarroako presidentea abendu hasieran bidaiatuko da Txile eta Argentinara eta parte hartuko du bertan San Frantsizko Xabier-en Eguna eta Nafarroako Eguna ospatzeko egingo diren ekitaldietan.

Bidaia abenduaren 5etik 10era bitartean garatuko da, eta behin-behineko egitarauak Txileko Nafarroako Etxera egingo duen bisita biltzen du, bertan hasiko baitu programa ofiziala, eta, ondoren, Argentinan, Buenos Aires hiriburukora eta Santa Fe probintziako Rosariokora egingo duena. Aldez aurretik izana da Sanz bi lekuotan, eta baita Mendozan ere, nafar gobernuak kooperazio eta gizarte arloan ematen dituen laguntzak zertan baliatzen diren aurrez aurre ikusten, besteak beste.

Bidaiaren lehenengo egunean, hiriburu txiletarrean, Sanzek Las Condesko Estadio Españolean egingo zaion ongi-etorri bazkari eta programan hartuko du parte, egunaren hasiera bertan goizeko hamaiketan Santiagoko artzapezpiku Francisco Javier Errazuriz Ossak --nafar jatorri kontzientekoa berau--  emango duen mezak markatuko duela.

Txilen, besteak beste, nafar gobernuak duela bi aste Agustin Otondo Dufurrena erratzuarrari, Nafarroako Etxe txiletarraren sortzaile gisa eta Nafarroako eta Txileren arteko harremanak ugaltzearren egindako zubilana saritzeko eman zion Karlos III Noblearen Gurutzea ezarriko dio Miguel Sanzek Nafarroa hamabost urte zituela utzi eta geroztik bizitza Txilen egin duen komunitate lokaleko buruzagiari. Zenbait liburu eta ikerlanen egile da Txileko Nafarroako Etxeko lehenengo presidentea izan zen Otondo Baztango eta Nafarroako abizen eta leinuez, eta euren presentziaz herrialde amerikar honetan.

Bidaiaren Txileko zatiaren ondoren, Argentinara mugitu da Sanz presidentea, bertan ere kontaktu ofizialak bertako autoritateekin eta elkarretaratzeak bertako Nafarroako Etxe eta nafar komunitateekin egingo dituela, tartean Buenos Aires eta Rosarioko Euskal Etxeak bisitatuz, EuskalKultura.com-ek ezagutu ahal izan duen behin-behineko programak dioenez.