euskalkultura.eus

euskal diaspora eta kultura

Albisteak rss

'Mate eta patxaran artean': payada eta bertso bira antolatzen ari da Argentina Uruguay eta Brasilen

2010/10/01

Wilson Saliwonczyk payadore argentinarra
Wilson Saliwonczyk payadore argentinarra

PUBLIZITATEA

Zeure euskal etxean nahi dituzula? Idatz iezaiezu, bada... Wilson Saliwonzyck payadore argentinarra eta Egoitz Zelaia euskal bertsolariak urriaren 20ean hasiko dute Hegoamerikan zehar egingo duten 'bertso-payada' bira. Bapatekotasunaren tradizio desberdinen arteko hartueman honi 'Entre mate y patxaran' izena jarri diote. Argentinan, Uruguaien eta Brasilen egingo dituzte emanaldiak. Antolatzaileek 'payada-saio' hauek zuzenean gozatu nahi dituzten euskal etxeei eurekin harremanetan jartzeko gonbitea egiten diete. Urtarrila arte 'errepidean' egoteko asmoa dute.

Donostia-San Sebastián. Wilson Saliwonczyk payadore argentinarra Euskal Herrian da egunotan eta joan den asteazkenean, irailaren 29an, emanaldia eskaini zuen Irisarrin (Nafarroa Beherea) Xabi eta Fredi Paya bertsolariekin batera.

Argentinara bueltan, Saliwonczyk Hegoameriketan zehar bertso-payada bira bati ekingo dio urriaren 20ean, Egoitz Zelaia Iparraldeko bertsolariarekin. Zelaia Argentinan bizi da egun eta euskara eta euskal kultura klaseak ematen ditu La Platako Unibertsitate Nazionalean. Payadorea eta bertsolaria, matea eta patxarana, indarrak batu eta Argentinan, Uruguaien eta Brasilen izango dira, bapatekotasunaren bi tradizio desberdin hauek (bi hizkuntza desberdin ere) batuz. Euskararik jakin ez eta bertso mundua ezagutu nahi dutenentzat aukera aparta izango da.

Emanaldi berriak antolatzeko aukera

"Duela gutxi hasi gara proposamenaren berri ematen", azaltzen dio Saliwonczyk-ek EuskalKultura.com-i, '"ta dagoeneko Uruguaien; Argentinako La Platan eta 9 de Julion; eta Brasileko Porto Alegren eta Sao Paulon emanaldiak egiteko aukerak azaldu zaizkigu. Bi inprobisatzaileak Argentinan bizi direnez eta birako emanaldiak 2011ko urtarrila arte luzatzeko aukera dagoenez, ikuskizuna zuzenean gozatu nahi duten Hegoameriketako euskal etxeei eurekin harremanetan jartzeko gonbitea egiten diete.

"Agenda ireki berria da", dio Saliwonczyk-ek, "eta gurekin harremanetan jarri nahi duenak contrapuntoar@yahoo.com.ar helbidera idatz dezake". 

Payadak-saioak; kantu bitartezko senidetzeak

Zer eskainiko duen ikuskizunak? Hainbat euskal etxetan izan da jadanik antzeko emanaldirik, 2008 urtean Saliwonczyk-ek, Paya anaiek eta Maialen Lujanbiok eskaini zuten biran (Euskal Herriko Bertso Txapelketako garaile izan zen Lujanbio 2009an, 14.000 lagunen aurrean kantari). Bira hartan Montevideoko Zitarrosa antzokia, adibidez, jendez lepo bete zen.

bertsolariak payadoreak zitarrosa

[Bertsolariak eta payadoreak Zitarrosa aretoko ikusleen txalo zaparrada eskertzen (argazkia W.Saliwonczyk)]

"Egoitzekin egingo dugun biran honetan aurrekoaren irudiak proiektatuko ditugu. Esperientzia zoragarria izan zen, kantu bitartezko senidetzeak ziren emanaldiak, eta leku askotan jendeak zutik txalotu zigun", gogoratzen du Saliwonczyk-ek.

-Ikusi iazko emanaldi bat, Sao Pauloko bertso-payada: BertsoPlaza-tv



« aurrekoa
hurrengoa »

Erlazionatutakoak

PUBLIZITATEA

PUBLIZITATEA

PUBLIZITATEA

PUBLIZITATEA

PUBLIZITATEA

Irakurrienak

Azken komentarioak

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia