euskalkultura.eus

Arrecifes, Argentina. Datorren abenduaren lehenean aurreneko aldiz lurreratuko da Euskal Herrian Maral Talde argentinarra. 2000. urtean Arrecifesen, Buenos Aires probintzia iparraldean, jaio zen talde honek musika errepertorio zabala eskaintzen du Argentinan jotzen duenean: folklorea, tangoa eta Euskal Herriko kantuak. Lotura estua dauka taldeak euskal kulturarekin eta izan ere taldeko abeslari eta liderra, Mariana Dominé Irigoyen, Arrecifeseko 'Euskaldunak Danak Bat' Euskal Etxeko lehendakari izandakoa da hamarkada hone hasieran.

Marianarekin batera, Adrian Charras, Christian Rodriguez, Billy Vogt eta Maria Eugenia Cozzak osatzen duten taldea. Maralek, besteak beste, Argentinako zenbait Euskal Aste Nazionaletan jo izan du, hala nola Necochea 2005en eta Cordoba 2006an. 2007an, berriz, Nazioarteko EuskoCantat txapelketa irabazi zuen, 'Maitia nun zira' eta 'Begira nago' kantuekin.

Emanaldiak Gasteiz, Oiartzun eta Durangon

Aurten, Euskal Herrira joan eta Gasteizen Abenduaren 3an Euskararen Eguna ospatzeko egingo diren ekitaldietan parte hartzeko gonbidapena jaso du Maralek, eta horrekin batera aspaldiko ametsa betetzeko aukera: Euskal Herrian lehenengo aldiz kantatzea. “Egia esateko, kosta egiten zait sinestea gertatzen ari zaiguna. Harrituta gaude oraindik eta espero dugu gauza izatea, behin han egonda, geure musika hemen egiten dugun moduan ezagutarazteko”, aitortzen dio Dominék hunkituta Euskalkultura.com-i .

Euskal Herrian, abenduaren 3an Euskararen Egunean kantatu ondoren, Juan Mari Beltranen eskutik antolatutako kontzertu batean joko dute abenduaren 6an Oiartzunen, gaueko 9an bertako Udaletxean. Birarekin bukatzeko, Durangon, Euskal liburu eta Disko Azokaren baitan ere aurkeztuko dira, Azokaren Aretoan, abenduaren 8an, arratsaldeko 5etan.

Lotura interesgarriak

-Aita semeak tabernan daude pieza, Maralek kantatua
-Lau teilatu gainean, Maralek kantatua