euskalkultura.eus

Mar del Plata, Argentina. Bederatzi eguneko egitaraua joan den ostegunean hasi zen, abenduaren 3an, Euskararen Eguna ospatzeko Mar del Platako San Martin Plazan dagoen Gernikako Arbolaren kimuaren aurrean lore-eskaintza bat eginez eta egunaren esanguraz hitz batzuk jaurtiz arratsaldeko ordubatean. Egun berean baina iluntzean eta Euskal Etxean, 'Kutsidazu bidea, Ixabel' filma eta Kimuak saileko izenburu batzuk eman ziren. Aldi berean, erakusketa bat ere zabaldu zen, Nevada-Renoko Unibertsitate estatubatuarrak --EuskalKultura.com medio-- Euskal Etxeko liburutegiari oparitutako liburu sortekin.

Ostiralean, hitzaldi bat eskaini zuen Mauro Vitullok, "Mauricio Flores Kaperotxipi, Euskal Artearen enbaxadari Mar del Platan" izenburupean, gai bera harturik parte hartu baitzuen hizlariak Deustuko Unibertsitatean antolatutako Exilioari buruzko X. Kongresuan. Larunbatean, berriz, gaueko bederatzi t'erdietatik aurrera, Denak Bat-eko Urte Azkeneko Afari Handia egin zen, eta urtero ohi bezala Artaburu Euskaltzale Elkarteak eginiko 'Euskara Denontzat' urtekaria banatu zen bertaratutakoen artean.

Azkenik, datorren larunbateko ekitaldiei dagokienez, arratsaldeko zazpietan hasiko dira, Euskal Etxeko Hitzaldi Aretoan txokolatealdia eginez, baita haur eta gaztetxoentzako tailerrak eta Herensugeari buruzko antzezpen bat. Olentzeroren bisita ere hartuko dute bildutakoek. Parte hartzeko txartelak, aldez aurretik salgai Euskal Etxean.