euskalkultura.eus

euskal diaspora eta kultura

Albisteak rss

Mar Chiquita partiduko Izatez Harro euskal etxeak erakundeko ehungarren kidea aurkeztu dio kolektibitateari

2011/07/13

Ekainaren 10ean 30 bazkide agiri berri eman zituen Mar Chiquita-ko Izatez Harro Euskal Etxeak (argazkia EE)
Ekainaren 10ean 30 bazkide agiri berri eman zituen Mar Chiquita-ko Izatez Harro Euskal Etxeak (argazkia EE)

PUBLIZITATEA

Duela bi urte eskas jaio zen Izatez Harro euskal etxe argentinarra Mar Chiquita partiduko Coronel Vidal Herrian eta oso denbora laburrean pauso handiak eman ditu. Buenos Aires probintziako eskualde honetan ez dauden hainbat zerbitzu eskuratzeko helburu aurrerakoiarekin, handituz joan da euskaldun taldeak bere komunitateari luzatu dion eskaintza. Lan hori egin ahal izateko langileak behar direnez, pozek beteta banatu dituzte euskal etxeko arduradunek hogeita hamar bazkide agiri berri joan den hilean. Ehungarrena, Tatiana Pelizzari Aguirre neskatoarentzat izan da, euskal etxeko kide gazteenarentzat.

Coronel Vidal, Argentina. Fernando Raul Mandagaranek bultzaturik, 2009an sortu zuten Mar Chiquitako euskaldunek Izatez Harro euskal etxea. Inguruko euskal etxeen laguntzarekin, gogotsu ekin zioten lanari erakunde berriko arduradunek, eta ez zen asko itxaron behar izan lan horren emaitzak ikusi ahal izateko.

2010eko abenduan, Buenos Aires probintziak onespena eman zion euskal elkarteari mutualitate gisa lan egiteko. Urrats hori gaindituta, formakuntza-zerbitzua jarri zuen abian euskal etxeak. Gazteei zuzendutako dagoen proiektu honen bidez, lan arlo ezberdinetako trebakuntza ematen zaie hainbat laguni, tartean osasuna, legeak, turismoa, kirolak eta enpresa ikasketa arloetan, batzuk aipatzearren soilik.

Horretaz gain, pasa den martxoan Izatez Harro euskal etxeak bere hornitegia inauguratu zuen. Denda honetan, adin guztientzako jendearentzako arropa dago, oso prezio onean eta kuotetan erosteko aukera ematen zaie erakundeko kideei. Ekimen hauek harrera ezin hobea izan dute Mar Chiquitako herritarren artean eta horren ondorioz, 'Nabarmenduak' saria jaso zuen euskal elkarteak 2010ean komunitatearen alde egindako lan eraginkorragatik.

100 bazkide

Agerikoa da euskal etxearen eta Mar Chiquitako komunitatearen artean dagoen harreman ona; horregatik ez da harritzekoa erakundeko bazkide zerrenda haziz joatea. Joan den ekainaren 10ean, herriko Nekazaritza Elkartean egindako ekitaldi batean hogeita hamar bazkide agiri berri banatu zituzten Izatez Harroko kideek. Hogeita hamar lagun hauekin, erakunde gaztea ehun kide izatera heldu da, eta ehungarrena Tatiana Pelizzari Aguirre da, euskal etxeko txikiena.

“Esker beroak eman nahi dizkiegu gugana hurbiltzen diren lagun guztiei. Ehun kide izatera heldu gara eta oso pozik gaude; Tatiana oso txikia da eta gurekin emango ditu bere lehenengo pausoak”, adierazi diote EuskalKultura.com-i Izatez Harroko arduradunek.

 



« aurrekoa
hurrengoa »

Erlazionatutakoak

PUBLIZITATEA

PUBLIZITATEA

PUBLIZITATEA

PUBLIZITATEA

PUBLIZITATEA

Irakurrienak

Azken komentarioak

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia