euskalkultura.eus

Madril, Espainia. Euskal Etxearen sorrerarekin batera jaio zen Madrilgo Euskal Orfeoia. Taldeak urtean bi kontzertu eskaini ohi ditu, gabonetakoa eta kurtso bukaerakoa, baina hau aldatu nahi da. Etapa berri batean dago orfeoia, Julio Elejalde Euskal Etxeko idazkariak EuskalKultura.com-i azaldu dionez. Bolada batez, 2003tik, isilik egon ostean, Jose Luis Zamanilloren zuzendaritzarekin bueltatu da agertokira eta joan den ostegunean  eskaini zuen 'itzulera kontzertua' Madrilgo San Ignazio elizan.

Apirilean hasi zituzten entseguak orfeoiko 41 kideek eta kontzertu berezi honetarako errepertorio zabala prestatu dute. 'Agur Jaunak' pieza herrikoiarekin bukatu zuten emanaldia eta bertakoentzat une hunkigarrienetakoa izan zela azaldu digu Elejaldek. Arrakasta izan zuen kontzertuak bertan zegoen Euskal Etxeko idazkariaren esanetan, 'bai orfeoiak egindako emanaldi onagatik, baita ere hura entzutera gerturatu zen publiko anitzagatik'.

Bukaera hunkigarriaz gain, Julio Elejaldek bereziki nabarmentzen du Jose Luis Zamanillok bakarlari bezala egindako lan ona eta Carmen Bocanegra sopranoak Schuberten 'Ave Maria'-ren interpretazio bikaina. Aldi berean, Euskal Etxetik Zamanilloren lana zoriondu nahi izan da bi hilabetetan orfeoiarekin egindako lanagatik. 'Berriz ere gure orfeoia errealitate bat da, honetan bai lortu dugula orfeoia berriro abian jartzea'. Datorren emanaldia irailaren 29an izango da Pello Arambururen omenez antolatu den urteurren ekitaldian.

Webgune berria orfeoiarentzat

Madrilgo Euskal Etxeko webguneaz gain, orfeoiaren itzulerarekin batera, berriki estreinatu duen tresna bat du: webgunea www.coro.esp.st. Antonio Recuero koruko kideak egin du eta bertan aurki daiteke taldearen inguruko informazioa baita errezitaldietako musika eta letrak ere. Bertan eskaintzen diren materialekin orfeoiko kideek aukera dute kantak etxean errepertorioa praktikatzeko.

Euskal Etxetik kantatzea gustuko dutenak animatu nahi dituzte orfeoian parte hartzera. 'Egun 41 ahots ditugu eta 50etara iristea gustatuko litzaiguke'. Izena eman nahi edo informazioa eskuratu nahi dutenek honako telefonora deitu dezakete, 91 531 45 93, edo email bat bidali orfeon@euskaletxea-madrid.com helbidera. 'Orfeoia kide berrien zain dago'.