euskalkultura.eus

Euskara ikasi nahi dutenen lasaigarri, Unibertsitate Konplutenseko Karlos Cid Abasolo irakaslea euskara ikasi nahi dutenentzako dekalogo baten egile da. Madrilen sortua eta bera ere heldua zela euskara ikasitako pertsona izanik, ederki asko daki zertaz ari den, eta izan ere euskarari buruzko aurreiritzi eta mitoei aurre egiten pasatzen du bere irakasle lanaren zati bat. Cid Abasolok hitzaldia eman zuen orain aste batzuk Madrilen, Euskalerriaren Adiskideen Elkarteko hiriko delegazioa antolatzaile.

Madril, Espainia. Beti da interesgarri Karlos Cid Abasoloren gogoeta eta irakaspenak entzutea eta halaxe pentsatu zuten Euskalerriaren Adiskideen Elkarteko Gorteko Delegaziokoek --RSBAPeko Madrilgo adarrekoek alegia, Iñigo Lopez de Uralde buru-- hitzaldi informal bat ematera --"Euskara ikasteko zailtasunaren mitoa" izenburu-- gonbidatu zutenean hiriburuko Zerain euskal jatetxe eta sagardotegira joan den asteko asteazkenean, maiatzaren 23an.

Hitzaldiaren eta hitzorduaren berri ederki asko ematen du RSBAPeko Culturavascaenmadrid.com webguneak, Francisco de Paula García Martínek gaztelaniaz sinatzen duen artikulu edo postak. Normaltasunaren deia egin zuen Cid Abasolok, hitz zuhur eta lasaigarriak esanez, baina ez halakoak izanagatik, begibistakoak izanagatik, batere soberan daudenak, behin eta hamaika bider esanda ere euskarak mito eta aurreiritzi frangoren kontra egin behar baitu. Eta errealitatea bat baino ez da: euskara ikastea ez da beste edozein hizkuntza ikastea baino zailagoa, alemana, ingelesa, poloniera edo grekoa ikastea baino zailagoa. Baina, bistan da, ahalegintzea eskatzen du.

Konplutenseko Filologia irakasleak honako dekalogoa irakurri zien bertaratutakoei, euskara ikasi nahi duten gaztelania hiztunen lasaigarri:

1. Euskaraz, ingelesez bezala, ez dago ia genero diferentziarik
2. Ahoskera aldetik, gaztelaniaren identikoa da ia
3. Bost bakalak berberak dira
4. Azentuazioa berbera da hitz guztientzat... eta ez dauka azentu idatzirik
5. Aditz irregularrak oso oso gutxi dira
6. Ortografiak ez dauka zailtasun berezirik
7. Bidaia erabat euskaldunak diren herri batera joan eta hizkuntzan murgiltzeko laburra da (beste kontinenteren batean bizi diren erdaldunentzat salbu)
8. Euskarazko hedabildeak edonoren esku daude internet duen edonorentzat (eta hemen bai, mundu guztitik)
9. Ikasteko denbora eta erritmoak estandarrak dira beste edozein hizkuntzenen alboan
10. Hasierak eta ikaste prozesuari eusteak eskatzen duen motibazio eta lana, milurtedun hizkuntza bat ikasteak dakarren pozak konpentsatzen du

(jatorriz Culturavascaenmadrid.com-en argitara emana)