euskalkultura.eus

Valparaiso, Txile. Bostgarren Erregioa inguruko euskaldunak pozik dira egunotan, luzaroan itxaron ostean Valparaisoko Eusko Etxeak azkenean egoitza propioa izango baitu. Egoitza honetan elkarteak jarduerak burutzen eta euskal kultura txiletarren artean zabaltzen jarraitu ahal izango du. Inaugurazio ekitaldia bihar bertan egingo da, 19:00tan, egoitza berrian (Quillota 135-137 kalea, Vergara, Viña del Mar).

Ekitaldian elkarteko kideez eta Valparaisoko agintariez gain, Eusko Jaurlaritzaren ordezkaritza bat izango da, Guillermo Echenique, Kanpo Harremanetarako Idazkari Nagusia buru delarik. Berarekin batera bertaratuko da ere Ana Urchueguia, Jaurlaritzaren Txile eta Euskadirako ordezkaria. Jaurlaritzaren laguntza oso garrantzitsua izan da Valparaisoko euskaldunen amets hau egin bihurtu ahal izateko prozesu luzean.

Berrindartzea

Valparaisoko Eusko Etxeak 68 urte ditu jada, eta hasierako urteetan Parque Italiako etxetzar batean egon bazen ere, azken hamarkadetan egoitza egokirik ez zuen izan. Hala ere, elkarteak bizirik irautea lortu zuen, eta azken urteetan berrindartzea nabaria izan zuen, ekimen eta jarduera berri askorekin.

Azken urteotako berrindartzeak eman zituen fruituen artean honakoak aipa daitezke: 'Arrojos, dichas y nostalgias' liburua, Valparaisoko euskaldunen historiari buruzkoa; www.euskoetxea.cl webgunea; Eusko Jaurlaritzaren Gaztemundu, Euskara Munduan eta Laguntza Sozialen programetan parte hartzea eta Valparaisoko euskaldunei zuzenduriko ekimen kultural eta sozialen antolakuntza, besteak beste.

Lurrikara suntsitzailea

Ekimen eta jarduera guzti horiek bulego txiki batean antolatzen ziren, baina ofizina hori 2010eko otsailean Txilen izan zen lurrikara handiak hondatu zuen. Amore eman baino, Valparaisoko euskaldunek egoitza berria bilatzeari ekin zion eta, horretan ari zirela, Guillermo Echenique Idazkari Nagusiaren eta Ana Urchuegia ordezkariaren bisita jaso zuten. 

Bisita horretan euskal ordezkariek egoitza berria bilatzeko egitasmoan babesa agertu zieten Eusko Etxeko zuzendariei eta Jaurlaritzaren laguntza deialdietan proiektua aurkezteko gonbitea egin zieten. Elkartea buru belarri jarri zen lan horretan eta egoitza berrirako eraikina erosteko laguntza eskaerak baiezkoa jaso zuen euskal etxeen deialdian.  

[Ana Urchuegia ordezkaria, Archibaldo Uriarte, Eusko Etxea-ko presidentea eta Guillermo Echenique, Idazkari Nagusia, lurrikara ostean egin zuten bileran (argazkia ValparaisoEE)]

Erronka berriak

Urte bete beranduago, eta lan asko egin osten, dena prest da egoitza berriaren inauguraziorako. Elkarteko presidente Archibaldo Uriarteren aburuz, inaugurazio hau erakundearen "tema eta ahaleginaren" ondorioa da; "beti jarrera baikorra eta ametsa lortuko zutenaren konfiantza" izateari esker lortu duten emaitza. Orain, gaineratu du Uriartek, "erronka nagusia etxeari bizi berria ematea da, abian jartzen ari garen ekimenekin". 

Programa

Inaugurazio egitaraua 18:30tan abiatuko da, Guillermo Echenique Idazkari Nagusiak emango duen solasaldi batekin. Echeniquek azaroan Donostian egingo den Biltzarrari buruzko informazioa emango du. Ondoren inaugurazio ekitaldia egingo da: aurreskua, ongi etorria euskaraz, eta agintarien hitzak; Valparaisoko Eusko Etxearen plaka bat ematea Guillermo Echeniqueri eta luzaroan galduta egon zen jatorrizko plakaren aurkezpena.

Egunari bukaera emanez, koktela zerbitzatuko da, elkarteko txistulari baten musikak alaitua, eta ondoren pie de cueca izeneko dantzarekin ospatuko da Txile eta Euskal Herriaren arteko anaitasuna.