euskalkultura.eus

Vernon, AEB. Vernon ehun (100) biztanle baino gutxiago dituen Kaliforniako herri txiki bat da. John Leonis euskal amerikarrak sortu zuen XX. mende hasieran. Leonistarren izena herriaren historiari oso lotuta dago: sortzailea herriko alkate izan zen 50 urtez; eta Leonis Malburg ilobak hartu zion lekukoa eta beste 53 urtean egon da karguan.

2009ean Malburg-ek alkatetza utzi egin behar izan zuen, ustelkeria eskandalu baten ondorioz. Leonistarrek bertan izan duten kontrolaren eta nagusitasun/keriaren gogoangarri, Malburg-en bulegoak Leonis hiribideko Leonis Malburg eraikinean daude. Alkatearen hondamenarekin batera, La Villa Basque-n galera etorri zen eta Malburg-ek saldu egin zuen jatetxea. Jabe berriek lokala berriztatu eta aldatu egin nahi dute.

1960ko hamarkadan sortu zuen jatetxea Malburg Leonisek eta izena, La Villa Basque, arbaso euskaldunen omenez jarri zion. Jatetxearen sarreran, 'Zazpiak Bat' leloa duen armarri batek agurtzen ditu bisitariak. Hala ere, lokala berezia egiten duena ez da euskal jatorria, baizik eta bere dekorazio elegante eta 60ko hamarkada estilokoa, aldatu gabe mantendu izana geroztik, hainbeste urtetan.

Los Angeles Conservancy elkarteak kafetegiaren estiloa azpimarratzen du, jatetxearen jangela dotorea eta koktelen barra. Frank Sinatra-ren eta Dean Martin-en Rat Pack famatu hura etxean legez sentituko omen litzateke bertan.

Halakoa da jatetxearen 60etako kutsua, Mad Men telebista saio ezagunean ere agertu dela ('The Suitcase' atalean). Matthew Weiner, saioaren sortzaile eta ekoizleak, LA Times egunkariari azaldu dio aktoreek eta taldeko beste kideek oso gustura egin zutela lan han eta lokala ukitu barik gorde izana estimatu zutela. "Zalantzarik gabe jatetxea aldatzea edo berritzea gerta dakiokeen okerrena da, bai errodaietarako eta baita ere bizitza komertzialari begira", dio Weiner-ek.

-Gaiari buruz zenbait artikulu agertu dira. Horietarik bat erabili dugu honako testua idazteko. Jatorrizko artikulua ingelesez, Los Angeles Times egunkarian