euskalkultura.eus

euskal diaspora eta kultura

Albisteak rss

Loretako Euskaldunak Euskal Etxeko dantzariek kolorez eta alaitasunez bete zuten 'Coralmen-te' ekitaldia

2009/06/25

Loretako Euskaldunak euskal etxeko dantzariak. Ezkerretik eskuinera: Juana Diéguez, Yésica Saldaña, Gisela Pellejero, Jael Griffes, Graciana Goicoechandia, Ana Giurlani, Tatiana Iparraguirre, Camila Ordorica, María José Puente eta Iñaki Iparraguirre
Loretako Euskaldunak euskal etxeko dantzariak. Ezkerretik eskuinera: Juana Diéguez, Yésica Saldaña, Gisela Pellejero, Jael Griffes, Graciana Goicoechandia, Ana Giurlani, Tatiana Iparraguirre, Camila Ordorica, María José Puente eta Iñaki Iparraguirre

PUBLIZITATEA

Argentinako Las Flores herriko Euskal Etxeko kideak, neguko euskara barnetegiaren antolakuntzan erabat murgilduta egonda ere, ez diote horregatik beste hainbat jardueratan parte hartzeari uko egiten. Prest egon ohi dira beti herriko komunitateak antolatutako kultura eta elkartasun ekitaldietara joateko, eta halaxe, joan den asteburuan, euskal dantzak ekarri zituzten 'Coralmen-te' ekitaldira, gainerako gizataldeetako jendeek ezagutu ahal izateko. Horrekin batera, Cañuelaseko Denak Bat Euskal Etxeko abesbatza gonbidatu zuten, euskal kantuen erakusgarri. 'Coralmen-te' Las Floreseko Dante Alighieri Eskola Elebidunak urtero antolatutako musika topaketa da.

Las Flores, Argentina. Joan den larunbatean, ekainaren 20an, Las Floreseko euskaldunek Euskal Herriko kultura zabaldu eta ezagutarazteko aukera polit bat izan dute Las Floresen bertan antolatutako Coralmen-te ekitaldian. Coralmen-te, bertako Dante Alighieri Eskola Elebidunak urtero antolatzen duen ekintza kulturala da, eta lagun artean tea hartu eta hori egitearekin batera musikaz gozatzea dauka ezaugarri.

200.9ko edizio honetan, Las Floreseko ahots-talde bat eta Celia Bartolomé eta Marianela Adad bakarlariak aritu ziren. Euskal abestiak ere entzun ahal izan ziren jaialdian, Cañuelaseko Denak Bat Euskal Etxeko abesbatzarekin hain zuzen. Santiago López irakaslearen gidaritzapean, euskarazko nahiz gaztelaniazko errepertoria eskaini zuen hamabi lagunek osatutako koru honek, eta izugarrizko arrakasta lortu zuen. Izan ere, txalo ugariz agurtu zuen publikoak errezitala bukatu zenean.

Dantza egiteko garaian, euskaldunak nabarmendu ziren berriro. Las Floreseko Loretako Euskaldunak Euskal Etxeko dantzariek kolorez eta alaitasunez bete zuten aretoa Lore Arku eta Fandango dantzekin. Eskertu beharra dago hor euskal dantzari saiatuen ekarpena. Hauexek aritu ziren dantzari: Juana Diéguez, Yésica Saldaña, Gisela Pellejero, Jael Griffes, Graciana Goicoechandia, Ana Giurlani, Tatiana Iparraguirre, Camila Ordorica, María José Puente e Iñaki Iparraguirre.



« aurrekoa
hurrengoa »

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia